Liverpool chuan Anfield-ah Tottenham Hotspur an mikhual a, hun tawp dawna goal lut zarah mual neitu hi 2-1 in an chak hram a, Premier League hmahruaitu an ni leh thei a ni.
Premier League-a Liverpool in Tottenham an mikhual hnuhnung 24 ah mual neitute hi vawi khat chiah an la tlawm a. May 2011 khan Kenny Dalglish kaihhruaina hnuaiah Anfield-ah hian 0-2 in Spurs an hneh lo a, Tottenham hian Premier League hrim hrima Liverpool an hmachhawn vawi 12 ah vawi khat chiah chak hmel hi an la hmu thei bawk a, hei hi October 2017 khan niin, Wembley-ah 4-1 in an chak a ni.
Mauricio Pochettino chuan March 9 a Southampton laka 1-2 a an tlawm tuma a khelhtir thenkhat chu a thlak kual nual a, hmannia England tana inlan lo Kieran Trippier chuan right-back ah Kyle Walker-Peters a thlak a, midfielder inhliam Eric Dier aiah Toby Alderweireld chu a luhtir bawk a. Moussa Sissoko, Christian Eriksen leh Dele Alli te chu mual laiah a awmtir a, Pochettino chuan a pawlte chu nawr nattir a tum hmel hle.
Jurgen Klopp chuan ni 14 kaltaa Craven Cottage-a hnehna changtu zing atangin tlemte chauh a thlak danglam a, Fabinho leh Adam Lallana te chu substitute bench lamah a awmtir a, an aiah hian James Milner Jordan Henderson te chu bul a tantir a. Inhliam damkawr pahnih Naby Keita leh Xherdan Shaqiri te pawh substitute bench lamah an awm ve leh tan tawh a, tlar hmaah Mohamed Salah, Roberto Firmino leh Sadio Mane te chu an intlar bawk a ni.
Liverpool (4-3-3): Alisson; Trent Alexander-Arnold, Joel Matip, Virgil van Dijk, Andrew Robertson; James Milner, Jordan Henderson (c), Georginio Wijnaldum; Mohamed Salah, Roberto Firmino, Sadio Mane
Subs: Adam Lallana, Fabinho, Dejan Lovren, Naby Keita, Divock Origi, Simon Mignolet, Xherdan Shaqiri
Tottenham (3-5-2): Hugo Lloris (c); Toby Alderweireld, Davinson Sanchez, Jan Vertonghen; Kieran Trippier, Christian Eriksen, Moussa Sissoko, Dele Alli, Danny Rose; Harry Kane, Lucas Moura
Subs: Ben Davies, Oliver Skipp, Juan Foyth, Fernando Llorente, Paulo Gazzaniga, Victor Wanyama, Son Heung-Min
Inkhel an tan a, mikhual team zawk Tottenham chu a tir lamah hian an che tha nghal mah mah zawk a, mual neitu lampang chuan boruak an nei sang vak lo hle.
Liverpool chu tlemin an ziaawm chho a, goal thun theihna hun tha an neih hmasak berah an thil tum an tihlawhtling nghal nghe nghe a. Minute 16-ah Tottenham in 3-5-2 formation an hman chu a fuh lohna a lang a, Andrew Robertson chuan ball chu a sirah a tlanpui a, hei hi Spurs goal lamah chuan a vawrh phei a.
Ball kal phei chu Roberto Firmino chuan Jan Vertonghen leh Davinson Sanchez te inkar atangin a lo chang thei a, Hugo Lloris man hman lohin Spurs goal-ah chuan a lo tauh lut a, Liverpool chu hma a hruaipui a ni.
Goal luh hnuah hian Liverpool chuan inkhel an thunun chho tan hle a, ball pawh an chang hnem a, mahse goal erawh an thun belh thei mai tawh lo a. Tottenham pawhin an nawr let ve zel a, mahse anni pawhin an si phurh chu an sut thei mai bik lo a ni.
Team pahnihte chuan half time thlengin goal an thun zui lo ve ve a, Tottenham lam chu tlema an insiam that ve leh deuh avangin khelmualah pawh chungnung fal lutuk an awm lo ve leh ta deuh a, half time a thlenin Liverpool chuan 1-0 in hma an la hruai chhunzawm a ni.
He inkhelah hian first half chhung zawngin team pahnihte chuan goal zawnah vawi khat chiah ball an pet fuh a, chu chu Roberto Firmino goal thun tum kha a ni a. Kha goal kha Tottenham in Premier League bika goal 1300 an chhuahna chiah niin, anni aia goal chhuah hnem pakhat chiah an awm a, goal 1307 chhuahtu Everton chiah an ni.
Second half an khel chho leh a, Tottenham chuan hma an sawn viau a, ball pawh an chang hnem zawk a, mahse goal thun theihna hun tha an insiam thei chuang lo a, Liverpool bawk chu a hlauhawm zawkah an la tang tho a ni.
Minute 60 vel an khelh thlengin Liverpool chuan goal shot 9 an nei a, Tottenham chuan vawi 8 an nei bawk a, goal zawnah chuan vawi khat ve ve chiah an la pet fuh thung a ni. Mual neitute chuan attacking lampang aiin defending an buaipui zawk a ni ber a, Spurs chuan an nawr na sawt viau a, an si phurh chu sut ngei tum viau mahse an tum ang ngawtin an che thei lo thung.
Minute 70-ah Spurs thawhrimna chuan rah tha a chhuah ta nge nge a, Tottenham hian free kick an hlawh a, Harry Kane chuan petin, ball hi Kieran Trippier chuan ding lamah a la a. Trippier hian Christian Eriksen chu ball hi a pe ve leh chhawng a, Eriksen hian Lucas Moura chu pe ve lehin, Lucas hian hnai deuh atangin a lo thun a, mikhual team si phurh chu a sut ve leh ta a ni.
An inhnehtawk dawn emaw tih hnuah goal khat a lut leh hlauh mai a, minute 90-ah Liverpool chuan corner an hlawh a. Corner atanga ball kal phei chu Mohamed Salah chuan a lo tauh a, Lloris chuan a man bet lo a, ball kal zel chuan Toby Alderweireld chu a fuh a, Spurs goal-ah chuan a lut a, Liverpool chu he goal hmang hian an chak theih phah a ni.
Liverpool chuan vawi 32 khelhah point 79 an hmu a, Premier League hmahruaitu an ni leh ta a. An hnuai chiahah Manchester City awmin, anni hian vawi 31 khelhah point 77 an hmu a, Liverpool khelh ang zat an khelh a, an chak a nih chuan hmahruaitu hi an ni leh thei dawn a ni.
Tottenham chuan vawi 31 khelhah point 61 an hmu a, Manchester United nen an point hmuh zat a inang chiah a, Spurs hi goal difference-ah an san zawk avangin pathumnaah an awm a, United chu palinaah an awm thung a. Panganaa awm Arsenal chuan vawi 30 khelhah point 60 an hmu a, vawi 31 khelhah an chak chuan point 63 hmuin pathumnaah an chho thei dawn a ni.