Han chesual zauh mah se, Arsenal chuan Premier League-ah an game hnuhnung pahnihah hnehna an chang leh ta. Inrinni zan khan 5-2 laiin West Ham an hneh.

London Stadium-ah Arsenal tan Saka leh Odegaard te chuan penalty atangin goal khat an khung ve ve a, Gabriel, Trossard leh Havertz te chuan goal khat theuh an khung bawk. West Ham atangin Wan-Bissaka leh Emerson ten goal khat ve ve an khung.

Khelh 13 atangin Arsenal chuan point 25 an hlawhchhuak a, table-ah pahnihna niin, anni aia game khata khel tlem zawk Liverpool chu point 6-in an phak lo mek. Zanin hian Liverpool leh Manchester City an inhmachhawn dawn a, Arsenal chu title race-ah an la awm chhunzawm zel.

Inkhelh zawhah Arsenal boss Mikel Arteta chuan, "First half tawp lam minute 15 aiin, a tir lam minute 30 kha nuam ka tiin ka hlim zawk. Tha takin bul kan tan a, kan tha a tho bawk a, thiamna sang tak nei player kan hmu nual.

"Goal 4-na kan khung khan, goal ho tak kan chhuah a, free kick atangin mawi takin an lo khung bawk. Goal 5-na kan khung leh chiah kha chu a lawmawm a, inenchhinnan game dang second half lamah kan khelh theih phah a ni.

"Bukayo Saka hi player ngelnghet tak a ni, goal a khung reng a, assist a nei reng bawk a, inkhel theiin a awm deuh reng bawk nen, hei hi kan tan chuan thil tha tak a ni.

"Kan hna tha takin kan thawk a, duhthusam angin inkhel kan zo. Liverpool leh Manchester City inkhel hmuhnawm tak hahdam takin kan en thei dawn a ni."

December ni 5-ah Arsenal hian Manchester United an mikhual leh dawn a ni.