Ruben Amorim chuan Manchester United-in an dawrna chungchangah thutlukna engmah a la awm loh thu a sawi chhuak.

Erik ten Hag an ban hnuah Manchester United chuan Sporting manager Ruben Amorim chu an dawr nghal char char a, release clause pawh pek an inhuam.

Thawhlehni khan Sporting chuan thuchhuah an siam a, Manchester United chuan an manager Amorim lakchhuah nan release clause €10million (£8.6m) pek an inhuam tih an tarlang.

Media thenkhat chuan Manchester United leh Amorim te hi a thuphungin an inrem tawh ni tein an tarlang a, hetih lai hian Portuguese coach hian inremna leh thutlukna engmah a la awm loh thu thawhlehni zan khan a sawi.

Portuguese League Cup-ah Sporting chuan Nacional an hneh a, semi-finals an lut. An inkhelh zawhah Sporting-a a hma hun chungchang zawh a ni a, Amorim chuan engmah a sawi chian theih loh thu a sawi bawk.

"Kan club-in thuchhuah an siam, Manchester United atangin dawrna an dawng a, release clause pawh pek an inhuam.

"Chutih laiin thutlukna siamtu tur chu keimah ka ni a, ka duhthlanna hi a pawimawh hmasa ber. Tun dinhmunah chuan Sporting-a cham chhunzawm emaw chhuah emaw thutlukna ka la siam lo.

"Ka duh zawng chu ka ti mai a, player leh coach ka nih chhung pawhin ka duh dan hi ka dah pawimawh thin. Tun dinhmunah chuan thutlukna engmah ka la siam lo a ni," tiin Amorim chuan a sawi.

Tun weekend hian Sporting chuan Estrela da Amadora an hmachhawn dawn, hetah hian Sporting a la enkawl zel dawn em? Tih zawhna chu Amorim chuan, "Engmah ka tiam thei lo che u, ka hma hun tur chu a rawn chiang vat ang," tiin a chhang.

Thawhtanni khan Manchester United chuan an manager Erik ten Hag chu an ban a, Ruud van Nistelrooy chu interim manager a nih rih tur thu an tarlang bawk. Zanin hian United chuan Carabao Cup-ah Leicester City an hmachhawn dawn, hetah hian Nistelrooy chuan United team a ho dawn a ni.