UEFA Champions League title a lakpui deuh chiah a, Thomas Tuchel chuan Chelsea enkawl chhunzawm turin 2024 thleng contract a ziak thar leh bawk a. A chanchin chi hrang hrang kan lo hre fo tawh thin a, tun tumah chuan hriat lar vak loh lampang hrut ve thung ang.
German coach Tuchel hi Roman Abramovich hun laia Chelsea coach 15-na a ni tawh a. Paris Saint-Germain a chhuahsan hnuah hna nei loin a awm ren rawn a, Blues chuan an manager Frank Lampard an ban a, a hmun ruak luah tur hian an la lut a ni.
A pa Rudolf Tuchel chu football coach a ni thin a, hei vang hian Thomas pawh hian football a khelh chhoh phah a, a pain a kaihruai nasa bawk a, football pawh a man chak em em mai a. Rudolf hi a fapa coach hmasa ber tiin a sawi theih a, football pet dan zirtir tanin tun dinhmun hi a rawn thleng chho tawh a ni.
Football huang pawn lamah pawh Thomas Tuchel hi a lo inhmang ve tawh a, tun hnai tih theih, 2017 kumah khan model-ah te pawh a lo tang ve ngei a. Germany rama mipa magazine lar pakhat ‘Die Zeit’ a tar lan turin model atan an hmang a, New York khawpui velah camera hmaah a lo ding kawi sawi ve nasa hle.
Tuchel hi defender niin football a khel chho ve nual hman a, 1979-1988 chhung khan TSV Krumbach youth team lamah hun a hmang thin a, 1988-1993 chhung khan FC Augsburg youth team a zawm leh a. 1992 atang khan senior team lamah hun a hmang tan a, Stuttgarter Kickers a zawm a, game 8 khelhah goal 1 a thun ve nghe nghe a. 1994 atanga 1998 thleng SSV Ulm lamah a khel leh a, German third division club-ah hian game 69 khelin goal 2 chu a thun a ni.
Football a khelh lai hian chuti taka hlawhtling tia sawi theih a ni chiah lo a, sum lamah pawh a harsa chho ve hle a. Hei vang hian football khel reng chungin inhlawhna a zawng tel a, bar pakhatah a inhlawh thin a. Radio Bar an tihah chuan zu semtu an tih mai, barman angin a thawk thin.
1998 kumah khan a khup a tina a, a khup na vang hian duh anga inkhelh chhunzawm theih a ni ta lo a, hei vang hian kum 24 mi chauh niin football khelh chu a chawlhsan phah a. Senior team lama football a khelh chhung hi a rei lo hle a, kum 5 vel awrh chauh a inkhel ve hman a ni.
Inkhelh a chawlhsan tak hnuah hian lehkha a zir leh a, Business Administration a zir chhuak ta daih a. A hmaa sikul a kal thin lai khan football hmanga eizawn chu a tum ber a ni ngai lo a, Tuchel hian chhanchhuah hna thawktu helicopter khalh chu a chak ber thin a, chutiang nih theih tum chuan lehkha pawh a zir thin a ni.
Helicopter khalhtu nih tum viau mahse a pa chuan football khawvela inhmang thei turin a hrual ngar ngar thung a, a hnuah chuan Tuchel pawh hian helicopter khalh lampang chu a bawhzui ta lo a ni.
Borussia Dortmund leh Paris Saint-Germain coach hlui, German tactician hi football club a enkawl thin dan atangin hming lem an phuahsak a, ‘The Professor’ tiin an ko thin.