Tun weekend khan UFC Hall of Famer Khabib Nurmagomedov chu thlawhna aṭanga chhuktir a ni. Chhuktir a ni dan hi thlawhnaa chuang mi dang ten phone camera hmangin an lo record a, social media-ah a darh nasa hle.

January ni 11, inrinni khan Khabib Nurmagomedov leh a staff te chuan Las Vegas aṭangin Los Angeles pan an tum, Alaska Airlines-ah an chuang nia report a ni a, Khabib hi emergency exit row-ah a ṭhu.

Airline staff chuan kum 36 mi chu emergency exit bula a ṭhut avangin, rikrum thilah midang a pui thei ang em tiin a zawt. Khabib hian English hrethiam mah se, ṭawng lamah erawh harsatna a nei nia sawi a ni a, hetah hian an buai chho ta deuh a ni.

Flight attendant chuan midang a puih theih dawn loh chuan a ṭhutna thlak turin a ti, a ṭhutna a thlak duh lo a nih chuan thlawhna aṭanga chhuktir mai a tum. Flight attendant's manager chu koh a ni a, Khabib leh a staff te chu an bungrua te nne thlawhna aṭanga chhuktir an ni ta a ni.

Khabib a lawm lo hle, X lamah, "He thil hi sawifiah a ngai, AlaskaAir a ni lo a, FlyFrontier-ah zawk a ni.

"Hmeichhia kha a rawn kal a, hawihhawm lo takin min rawn bia. English ka thiam leh thiam loh te min rawn zawt a, English ka hrethiam a, pangngai taka ka ṭawng theih thu ka sawi bawk.

"A thil min rawn hrilh kha ka hrethiam a, rikrum thilah pawh midang ka puih theih tur thuin ka chhang. Chuti chung chuan ka ṭhutna ata thawhtir kha min tum hrim hrim niin a lang a, he thil hi chi inthliarna lam rawngkai a ni em ka sawi thei mai lo.

"Minute 2 kan inbiak hnu chuan security a ko a, thlawhna aṭanga chhuktir ka ni ta a ni. Kha thil thlen hnu darkar khat velah thlawhna dang hmangin ka thlen tumna hmun chu ka thleng ta tho e.

"Ka theihtawpin ka inbeng dai a, zahawm takin ka awm, video-a in hmuh ang khan. Thlawhnaa thawkte khan kha aia ṭha zawk kha mi dang pawh dawr tawh se ka duh khawp mai," tiin a tarlang.