Liverpool nen an inkhelh ṭuma a karek a tihhliam avangin Arsenal defender William Saliba chuan thla khat chhung chawlh a hmang dawn.

Saliba chawlh hun chhung tur hi France National team chuan an puang chiang a, a inhliam avang hian France tan pawh a fehchhuak thei lo a, a inhnukdawk a ni.

Liverpool laka si khat faia an tlawm ṭum khan Saliba hi kerek hliam avangin inkhelh ṭantirah a bai chhuak a, Arsenal match pawimawh tak tak a hmaih dawn a ni.

"Liverpool nen an inkhelh ṭum khan minute 5-na lekah kerek hliam avangin lak chhuah a ni a, ram tan pawh a inlan thei ta lo.

"A kerek veilam a tihliam a, French team doctor Franck Le Gall chuan ngun taka a endik hnuah Didier Deschamps chuan Saliba a chhawr theih loh tur thu a sawi a, ani aiah hian Benjamin Pavard koh niin, Saliba hi kar 4 a chawlh a ngai dawn a ni," tiin France team chuan thuchhuah an siam.

Saliba hian Nottingham Forest, Athletic Bilbao leh Manchester City te a hmachhawn thei dawn lo a, tin, Carabao Cup match-a  Port Vale an hmachhawn hunah pawh a inlan thei dawn lo a ni.

Newcastle United, Olympiacos leh West Ham te pawh a hmachhawn thei dawn lo nia report a ni bawk.

Liverpool an hmachhawn ṭum khan tun nipui bazara an lei Cristhian Mosquera chuan Saliba hi a thlak a, ani hi Valencia aṭangin Arsenal chuan £13million in an lei.

Saliba inhliam hi Arsenal tan chuan a pawi dawn hle, hetih lai hian Bayer Leverkusen aṭangin Piero Hincapie an lei a, kum 23 mi hi loan-in an la phawt a, nakkum lamah an lei zui dawn a, ani hi Saliba awm loh lai pawhin a chhawr theih dawn a ni.