Grand Slam title 22 kawltu Rafael Nadal chu a la inkhel thei dawn rih lova, zai a nih avangin thla nga dang tal a chawlh leh a ngai dawn.

January thla a Australian Open-a a inlan hnuah Nadal hi a la inkhel leh lova, a kawng na (hip injury) avangin a la chawl a, Zirtawpni liamta khan tluang taka zai a ni.

Inrinni liamta khan Nadal hian kum 37 a tling a, Spanish player hian nakkum thleng bak inkhelh a tum tawh loh thu a sawi a, mahse tuna a dinhmun enin, a tum aia hmain a chawlh a ngai lovang tih a sawi theih loh.

Tunah hian French Open an khel mek a, Nadal erawh a inlan thei lo. Nadal hi a vawi khat nan French Open-ah a inlan thei lova, vawi 14 a lo champion tawhnaah hian kum 19 hnuah a vawi khat nan a hmel kan hmu lo.

Nadal hi French Open-a champion hnem ber a ni a, ani aia Glam Slam title la hnem hi Men’s Singles-ah an awm lova, Novak Djokovic nen Grand Slam title 22 an la ve ve tawh a ni.