Liverpool a pan theih nan theih tawp a chhuah, Newcastle United lamin hralh an phal si lo. Transfer window inhawn chhung hun tam zawk kha chu Alexander Isak-a chanchin kan hria a nih kha.

Liverpool striker thar Isak chuan transfer chungchang a thlir let a, thil nihna mipui lamin an hriat loh thu a sawi chhuak. 

Liverpool a pan duh avangin a nuar, a club hlui Real Sociedad lamah te amahin training a nei. Newcastle United pre-season tour a zawm ve lo a, Magpies tan khelh a tum tawh loh thu thlengin a sawi chhuak a nih kha.

Transfer hun tawp dawn tak takah Liverpool chuan £125m-in an lei ta nge nge a, Isak a hlim hle. Liverpool tan a la inlan hman lo, ram tan a fehchhuak leh nghal a, si hnih faia Kosovo an hneh loh tumin Isak chuan transfer chungchang a sawi chhuak.

"Thil nihna tak hre chiang tumah an awm lo. Hemi chungchang erawh hun remchangah kan la sawi chhuak dawn  nia.

"Media lama an thuchhuah leh an sawi te hi ka duh dan angin ka ziahtirin kan sawitir thei lo. Liverpool player ka ni thei hi ka hlim em em a ni," tiin Alexander Isak chuan a sawi.

Si hnih an phurh hnu minute 18 a la awmin Isak chuan Anthony Elanga a thlak a, goal zawnah vawi hnih a shot a, yellow card a chawi bawk.

"Ram tana ka fehchhuah hmain engkim tihfel a ni hman a, tunah chuan football chauh ka buaipui thei ta. Liverpool hi ka tan hmun thar a ni a, rilru leh game khelh phungah nasa taka ka insiamrem a ngai a ni," tiin Isak chuan a sawi bawk.

Zirtawpni khan Slovenia nen 2-2 in an inhnehtawk a, khatah khan substitute-ah awmin, a inkhel ve lo. Sweden manager chuan, "Vawi 3 chiah kan hnenah training a la nei a, inkhel turin duhthu a la sam lo a ni," tiin a sawi a nih kha.