Khawvela football thuneitu sang ber FIFA lama an president Gianni Infantino chuan World Cup chu kum hnih dana neih a thlawp hle a, kum li dana an neih avanga World Cup chu hlu a nih loh thu leh thil hlut leh hlut loh chu a quality a zir a nih thu Infantino hian a sawi.

Tunah hian kum li dana neih thin FIFA World Cup chu kum hnih dana neih rawtna a awm mek a, hei hi FIFA hian thlawp viau mahse Europe-a football thuneitu sang ber UEFA lam chuan an duh lo hle a, UEFA bakah hian South America-a football theuneitu sang ber CONMEBOL pawhin kum hnih dana World Cup khelh hi an thlawp lo niin a lang.

“Kum 2026 atangin team 48 awmna World Cup chu khelh tur chu thu tihtluk a ni tawh a, mahse World Cup hi kum li dana khelh a ni zel dawn nge, kum hnih dana khelh a ni dawn tih chu ngaihtuah mek a la ni.

“World Cup mai nilo, heng event ropui tak tak te hi an ropui avang takin neih zin a tha zawk a, thil a hlut leh hlut loh chu neih zin a nih leh nih loh lamah innghat lovin, a quality-a zir a ni zawk. Super Bowl pawh kumtinin an khel a, Wimbledon leh Champions League te pawh kum tina khelh a ni a, mi an phur em em reng a, an nghakhlel em em reng tho a ni,” tiin FIFA president Infantino chuan a sawi.