Nilaini zan khan Carabao Cup second round-ah Manchester United chuan Grimsby an tlawh, team hnih te hun pangngaiah 2-2 in an inhnehtawk a, penalty shootout-ah Grimsby hian 12-11 in hnehna an chang.
Grimsby hi League Two team an ni a, Premier League hnuai fe, 4th division tihna a nih chu. 4th Division club-in a vawi khat nan Manchester United an hneh a, hei hi United-in record chhe deuh an neih thar chu a ni ta bawk.
Tun season Premier League game 2 an khelh tawhah United-in hnehna an chang zo lo ve ve. Arsenal lakah si khat faiin an tlawm a, Fulham nen 1-1 in an inhnehtawk. Carabao Cup-ah League Two team Grimsby chuan an hneh leh bawk.
Blundell Park-ah hian mual neitu Grimsby Town an khel ṭha zawk a, first half-ah goal hnih an khung, heng te hi Onana tihsual ve ve a ni nghe nghe.
Minute 22-ah Bernam chuan box veilam aṭangin lei hrulah a shot a, awlsamtea save theih tur nia a lan laiin, Onana chuan a chhuah zuk mai.
Minute 30-ah Grimsby chuan corner an pet, Onana chuan hnek chhuah tumin a rawn thlawk chhuak, mahse a hnek ṭhelh chiang kher mai. Hei hi Warren chuan a chhuih goal chhunzawm ta a ni.
Second half minute 75-ah Mbeumo chuan United tana a goal hmasa ber a khung a, a ke veilamin bottom corner-ah mawi takin a dah goal.
Hun tawp dawn tak tak 89 minute-ah United chuan corner an hlawhchhuak a, heta ṭang hian Harry Maguire chuan a tauh goal a, 2-2 in an inhnehtawk a, penalty shootout hmangin chak zawk an zawng.
Penalty pangngaiah 4-4 in an inhnehtawk, Grimsby tan Oduor chuan a pet goal lo a, United-in an pet goal chuan an chak thei, mahse Cunha chuan a pet goal lo. Sudden death a ni a, vawi 13 lai an pet hnuah a hnuhnung bera pet Mbeuma chuan a pet goal lo ve leh a, 12-11 in United chu an chak ta lo a ni.
Inkhelh zawhah United boss Ruben Amorim a hnual hle, "Kan khel chhe hle a, kan khelh danah khan thil dik lo chiang takin a rawn lang chhuak, tihdanglam ngai kan nei tih a chiang ta a ni.
"Team pumpui a ban theih loh, manager hi ban theih chu ka ni. Kan result khan min ṭhawng hle a, ka hnual em em bawk. Kan khelh danah khan sawi tur ka nei lo, thil dik lo hi ka sawifiah vek thei lo a ni.
"Kan tihsualna ngaiah kan tisual leh ṭhin a, min ṭantute lakah pawh a inthlahrunawm, kan khel chhe hle a ni. Kan khingpuite khan inkhelh an thunun a, keini erawh kan khel chhe hle.
"A tir aṭang rengin kan game a ṭang tawk lo a, mual chhungah khan inrintawkna an nei lo a, tihngaihna an hre lo hlawm bawk a ni.
"Chak lo mah ila hmasawnna hmuh tur a awm hi chuan a lawmawm ṭhin. Mahse he game-ah hi chuan thil lawmawm hmuh tur engmah a awm lo, kan buaina hi a hmaa kan buaina tho a la ni e," tiin Amorim a sawi.