Pawngsual leh mawi lo taka hmeichhe rikrap thubuai awrh mek Thomas Partey chuan thiam lohna a neih loh thu a sawi.

He thubuai chungchang hi kum 2022 February thla aṭanga chhui ṭan tawh kha niin, hmeichhe pathum te chuan Ghanaian midfielder lakah hian puhna thubuai an ziak lut.

Hmeichhe pathumte hian a hran ṭheuhin thubuai an ziak lut a, kum 2021 leh 2022 inkara thil thleng niin an sawi a, Partey hi Arsenal tana a khelh lai a ni.

Nilaini khan Partey chu Southwark Crown Court-ah a inlan a, nakkum November ni 2-ah trial neih leh tur a ni.

Thubuai a neih chhung hian Partey hi a inkhel thei dawn tho a, hetih lai hian ram danga a zin chhuak dawn a nih chuan, a zin hma darkar 24 chhungin Police te hnenah a in report a ngai ṭhin dawn. Tin, amah puhtute hi engti kawng maha a biak pawh phal a ni lo bawk.

Arsenal-a a contract a zawh hnuin kum 32 mi Partey hian Spanish club Villarreal a zawm a, thawhlehni zana Champions League match-ah Tottenham an hneh loh ṭum pawh khan a inlan nghe nghe.

Thubuai a neih hnuah Partey hi England-ah a inkhel leh tawh lo a, Tottenham an hmachhawn khan competitive football a khel leh chauh. 

August ni 5 khan Westminster Magistrates’ Court-ah Partey hi a inlan a, bail phalsak a ni a, hemi hnu ni hnihah Spanish club Villarreal chu free transfer-in a zawm a, kum khat atan contract ziakin, hetah hian thla 12-a pawhsei theihna ziah tel a ni bawk.

Kum 2020 khan Partey hian Atletico Madrid aṭangin Arsenal a zawm a, an inleina kha €50million a ni a, North London club tan game 167 a khel a, Ghana tan game 53 a khel tawh bawk a, World Cup 2022-ah pawh khan ram tan a inlan a ni.