Liverpool midfielder Thiago Alcantara chuan Saudi Arabia atangin sum tam taka dawrtu nei mah se a hnar niin chanchinbu mite chuan an ziak.

Kuminah Saudi Pro League club ten sum tam tak tak hmangin an league-ah player tha an thlem lut mek a, Cristiano Ronaldo an lakluh hnuah Ballon d’Or winner Karim Benzema, N’Golo Kante, Ruben Neves leh midang te pawh an lalut tawh.

Thiago dawrtu club hming hi sawi lan a awm lova, Thiago hi contract mawm tha tak an zawrh nia tarlan a ni a, mahse Liverpool erawh inbiakna an neihpui hman lova, Thiago hian a lo hnar nghal vang a niin a lang.

Kum 32 mi hian Liverpool-ah season khat daih chiah contract nei tawh mah se, sum uma Europe chhuahsan mai a tum lo niin a lang a, season tharah Thiago hi Liverpool-ah a la awm zel a rinawm a  ni.

Kum 2020 nipui lai khan Liverpool hian Bayern Munich atangin Thiago hi an lei a, a manah pound maktaduai 20 sengin, add ons nen Spanish midfielder man hian pound maktaduai 25 a hawlh chho thei.

Bayern-a khel tha thin hle mah se, Liverpool a pan hnuah erawh Thiago hian beisei a pha lova, hliamin a tlakbuak fo nen Liverpool a chhuahsan mai dawn nia sawi a tam hman viau a, mahse Anfield-a a contract a hmang zo dawn niin a lang a ni.