Nilaini zan khan FA Cup match-ah Manchester United chuan 3-1 in West Ham an hneh a, Manchester United tan Garnacho leh Fred ten goal an khung bakah Aguerd chuan an lamah a ti goal bawk.
World Cup zawh atang khan Manchester United hian game 20 khel tawhin, vawi khat chiah an chak lo a, vawi 3 an khingpui an inhnehtawkpui a, vawi 16 lai hnehna an chang.
Europe Club zingah World Cup zawh atanga hnehna chang hnem ber an ni a, hei hi a chhan chu League Cup an khelh bakah Europa League Round of 16 play off match an khelh vang a ni a, mi dang aiin match an khel hnem a, hnehna pawh an chang hnem bawk a ni.
Pathianni khan Newcastle United hnehin Carabao Cup an chawi a, Erik ten Hag chuan League Cup bak trophy dang lak a la tum thu a sawi chhuak bawk.
West Ham an hmachhawn tum hian Harry Maguire chuan starting XI a chang a, United boss Ten Hag chuan, "Game ka siksawi danin hma a sawn ve zel e.
"Player viak tha te ka thlang zawk thin a, chutih laiin Maguire a khel tha khawp mai. Ball kan chhuhsak dan kawngah pawh tha a thawh hlawk hle.
"Ball chan a duh a, ropui tak taka chet chang pawh a nei nual mai. Khel tura ka duh dan a hre chiang a, thiamna leh theihna a nei sang a, Centre-back ni chungin skills nei tha tak a ni bawk, kan tan a hmang zel dawn a ni," tiin Maguire a fak.
Weghorst chuan Manchester United a zawm hnuah goal khat chiah a la khung, West Ham an hneh tum pawh hian goal khungna hun remchang vawi hnih khat a nei, mahse a hlah leh a nih kha.
Heti chung hian United boss Ten Hag chuan, "Weghorst kha mual chhunga inkhel zingah player tha ber pakhat a ni.
"Own goal a luh dawn khan khingpui te tan a hnawksak em em a. Garnacho-a'n goal a khung dawn khan pressure a pe na em em.
"Tin, goal thumna a luhna chhan pawh amah atangin ball a chhuak, pressure a pek nat avangin goal kan khung phah ta nual mai.
"Hna ropui tak team tan a thawk a ni. Season kan tan tirh khan Marcus Rashford khan game tin goal a khung lo. Mahse goal a khung chho dawn tih ka hria, Weghorst hian goal a khung chuan, a khung chho ve zut ngei ang tih ka ring tlat a ni," tiin a sawi.
FA Cup Quarter final draw neih nghal a ni a, Manchester Unied chuan Fulham an hmachhawn dawn a, Premier League club lian dang zingah chuan Manchester City pawh an la dam a, anni hian Burnley an hmachhawn ang.
Tin, tun Pathianni zan dar 10 hian Premier League match-ah Liverpool an hmachhawn dawn bawk a ni.