La Liga president Javier Tebas chuan FIFA-in Club World Cup tihlen a tum chu a duh lo hle a, hnawl turin FIFA president Gianni Infantino chu a hrilh hial.

Thawhlehni khan European Professional Football Forum chu Brussels-ah neih a ni a, hetah hian La Liga boss chuan player leh sumdawngte pawhin Club World Cup tihlen chu tha an tih loh thu a sawi chhuak bawk.

Nakkum nipui atang hian Club World Cup chu tihlen a ni dawn a, club 32 an tel tawh dawn. hei hi Global players’ union FIFPro leh European League te pawhin an duh lo hle a, league match leh international match tam tak an khelh hnuah, hetianga tournament buatsaih leh hi FIFA chu sum duh uchuakah an ngai hlawm.

"Mr President (Infantino), Club World Cup broadcast rights pawh in la hralh lo a ni lawm ni? Sponsorhip rights pawh in la hralh lo. Player te pawhin an duh lo a, club pawhin an duh lo bawk, chuvang chuan Club World Cup hi chu hnawl mai teh u.

"FIFA pawisa in hmang a nih chuan, ram-in pawisa an dawn tur tam tak in la heu dawn tihna a ni a, khawngaihin Club World Cup hi chu hnawl hram teh u khai," tiin La Liga President Javier Tebas chuan a sawi.

Club World Cup tihlen hi footballer tam takin an duh lo a, player thenkhat pawh an tawngchhuak nual tawh. Player leh club ten hamthatna an nei tam dawn lo a, a hlawk ber tur chu FIFA a ni dawn tih a lang chiang a, player te chuan match an khelh hnem lutuk avangin an inhliam nasat thu an sawi mek bawk.