England chuan kumin World Cup Group match-ah harsatna nei lem lovin round of 16 an inpet kai a, Group leader niin Senegal nen round of 16-ah an inhmachhawn dawn a ni.

England midfielder Declan Rice a phur hle, ram dangte tan England chu huphurhawm tak an nih thu a sawi chhuak. Hammers midfielder hi Southgate chuan rinrawlah a hmang mek bawk.

Kum 1966 hnuah England hian Major Trophy an chawi leh tawh lo, round sang thlen chang nei thin mah se trophy la lo tawk chiah chiahin an awm thin. Euro hnuhnung berah pawh final lut mah se penalt shootout-ah Italy an hneh lo a nih kha.

England hian Qatar World Cup Group B match vawi 3 an khelah goal 9 an khung. Iran 6-2 laia an sawp hnua US nen goal khung loa an inhnehtawk khan England tantute a tilunghnur deuh hman a, mahse Wales lakah 3-0 a hnehna rawn chang lehin Group B-ah dinhmun sang ber an luah. Pathianniah Group A pahnihna Senegal an hmachhawn dawn a ni.

Declan Rice chuan, "Ram dang ho hian kan thiamnate hi an thlir reng a, eng vangin nge min hlauh loh teh lul ang?

"Khawvel huap pawha talent nei tha kan nei a, team lian ber pawl kan ni. Khelmualah kan lantir zel bawk ang.

"Brazil hi World Cup-ah an lo champion nual tawh a, anni hi team tha nia ngaih a ni. Helai hmunah hian Round of 16 chiah thleng turin kan lo kal lo, chak turin kan lo kal," tiin a sawi.

Southgate leh a pawlte hian Senegal an hneh a nih chuan quarter final-ah France emaw Poland emaw an tum thei dawn a ni.

An inkhelh dan pawhin hma a sawn chhoh zel thu Rice chuan a sawi bawk a. "France-in Tunisia an hneh loh thu pawh ka lo hria a, thil engkim hi a thleng thei a ni. Kan game 3 khelh tawh atang pawh khan chet sual palh hi a awm ve thei tih kan chiang a ni.

"Team tha kan tum chuan keini pawhin hmasawnna kan zei chho ve zel, chutiang tur chuan kan inpeih thawkhat tawh e," tiin England midfielder chuan a sawi.