Chelsea chuan Sunday zan khan Premier League inkhelah Aston Villa chu Stamford Bridge-ah an hneh lova, inkhelh zawhah Chelsea manager Mauricio Pochettino chuan team anga hma an sawn a ngai tih leh, a mimal ang ringawta hmasawn chu a tawk lo tih a sawi.

Chelsea hian Aston Villa hi si khat faiin an hneh lova, goal awmchhun hi Ollie Watkins-a’n 73mins-a a thun a ni a, Chelsea right-back Malo Gusto chu darkar khat an khelh tlin hma hreta hnawhchhuah a ni.

Season hmasa a che chhe tak Chelsea hian tun season-ah pawh bul an tan tha lo hle a, Premier League-ah game 6 an khelh tawhah vawi khat bak an la chak lo. Chelsea hi vawi thum lai tlawm tawhin, point 5 bak an la nei lova, 14-na dinhmun an luah.

Tun season hi kum 1978 hnua Chelsea in bul an la tan chhiat ber tum a ni a, a zawnin game thumah goal an khung tawh lova, player inhliam an ngah bakah, Gusto chu hrem a ni a, Chelsea striker thar Nicolas Jackson pawh game 6 atangin yellow card vawi 5 a hmuh tawh avangin game khat a inkhel thei dawn lo a ni.

Chelsea boss Pochettino chuan, “Mimal ang chauha hmasawn lovin, team anga hma kan sawn a ngai a, Nicolas Jackson te ang pawh player naupang an ni a, Premier League-a insiamrem dan a zir mek a ni. Hun a mamawh a, hetiang game-ah hi chuan chak ngei kan duh. Player naupang te hi an tawnhriat atangin an inzir chhoh a ngai a, an tihsual neihte atanga inzir zel tur an ni.

“Kan dinhmun hi kan thlak danglam thuai a ngai a, chu chu player te mawhphurhna a ni. Referee te emaw VAR emaw kan puh thiang lova, kan awmdan kan thlak danglam a ngai zawk. Malo Gusto chungchang hi engmah ka sawi dawn lova, tu mah puh ka tum lova, a chhan chu hetiang hi football-ah chuan a thlen chang a awm a, hetiang hian inkhel leh team ah a tha lo zawngin nghawng a nei thin a ni,” tiin a sawi.