Mizo Boxer-te kawng buatsaihna tur leh professional an luhchilh theih nan Tata SK Fight Night 3 buatsaih a ni dawn a, Assamese boxer pali an tel bawk ang.
LPS Promotion chuan Dawrpui Multipurpose Centre, Aizawlah zan hnih chhung inhnek a huaihawt dawn a. Inhnek vawi 18 awm tura tih niin March 10, zirtawpni zanah inhnek vawi sarih leh March 11, inrinni zanah inhnek tum ruk a awm dawn a ni.
Kum 2022 LPS Pro Fight boxer țhaten zin kawng thui zawk an zawh theihna tura tih a nih rualin Mizo boxer 10 leh Assamese fighter paliin professional an luhchilhna tur a ni nghal ang.
Pro Fight champion lai panga zingah featherweight title kawltu Lalrosangzuala'n mi mal thilah harsatna a nei a, inhnek tura tih a nih hnuah lightweight champion Vanlalawmpuia a inhliam a, an inlan thei dawn lo.
Flyweight champion Laldinsanga'n professional vawi thum a khelh tawhah a bitum a knockout vek a, Adarsh Kamei nen an innuai dawn.
Welterweight champion C Lalhruaitluanga'n Arnab Chirua a hmachhawn dawn a, profssional tum nga a khelh tawhah a la chak vek a ni.
Nikum September khan Pro Fight atangin Lalrinngheta'n professional a luhchilh a, final-ah rin hlawh lo zawk ni chungin F Zoramchhana a hneh.
Tun hi a inlan leh hmasak ber tur niin tunlaia combat sports huang hrang hranga tel hnem tak Nazareth Lalthazuala nen an intawng dawn. Kawng dika kir tumin hruihrual chhungah Mizo boxer langsar Zotea leh 2015 Pro Fight bantamweight champion HC Lalramfela an lut ve thung dawn.
An inhnek hnuhnun vawi hnihah an tlawm zawn ve ve a, professional luhchilh tur ve ve an hmachhawn dawn a, Zotea'n Luangmual Vengthlang boxer Johan Lalrinpuia bitumin Ramfela leh Swarupam Bhattacharjee an inhnek ang.
March ni 9, Ningani zing dar 8:00-ah LPS Office Zarkawtah Boxer te inbuk leh inepna hun an nei dawn a, Fight Night 3 inhneka a chak zawkin Rs 10,000/- an dawng ang a, chak lo zawkin Rs 5,000/- an dawng thung ang.
LPS Promotion chuan March 2021 khan a vawi khat nan Mizoramah professional inhnek a huaihawt a, LPS Fight Night 1-ah Lalrinsanga Tlau chuan Ghanaian Eric Quarm hnehin WBC Youth Super Featherweight title a hnek chhuak. November 2021 khan LPS Fight Night 2-ah NT Lalbiakkima'n Thai fighter Gerttipong Kumsawat hnehin professional weight zang berah IBA Inter-Continental title a humhim bawk a ni.
Mizorama Tata Motors commercial dealer Zothan Autoworks-in title sponsorship chang felin Tata SK 710 Fight Night 3 tiin a hming vuah a ni a, September leh October-a buatsaih tur 2023 LPS Pro Fight-ah title sponsor a ni tel bawk ang.
Zothan Autoworks hian Mizoram boxing-ah hnuhma a nei nual a, Pro Fight-ah vawi thum - 2016, 2019 leh 2022-ah title sponsor a ni tawh a. A vawi li nan he dinhmun luah tur hian LPS Promotion nen Fight Night 3-a inremna an siam rualin an indawr fel nghal a ni.
TATA SK 710 FIGHT NIGHT 3
Professional Boxing - bout 13 FIGHT CARD March 10, 2023 (Zirtawpni) zan - 8:00 pm Dawrpui Multipurpose Centra, Aizawl
BOUT 7
FLYWEIGHT
Samuel Lalthlamuana (Saitual) vs C Lalsiama (Luangmual Vengthlang)
FEATHERWEIGHT
Omega Lalramdina (Dinthar) vs David Laldanmawia (Lunglei)
LIGHTWEIGHT
Lalruatzela Hauzel (Mission Veng) vs Vanlalringa (Serchhip)
WELTERWEIGHT
Jakob HC Biaknienga (Falkawn) vs Stphen Varte (Manipur)
BANTAMWEIGHT Lalrinngheta (Tuipui) vs Nazareth Lalthazuala (Zemabawk)
FEATHERWEIGHT
F Zoramchhana (Cherhlun) vs Johan Lalrinpuia (Luangmual Vengthlang)
WELTERWEIGHT
C Lalhruaitluanga (Chawngtlai) vs Arnab Chirua (Assam)
March 11, 2023 (Inrinni) zan - 8:00 pm Dawrpui Multipurpose Centra, Aizawl BOUT 6
FLYWEIGHT
Joseph Lalremruata (Sailulak) vs Vanlalenkawltira (Champhai Dinthar)
FEATHERWEIGHT
Lalpektluanga (Darlawng) vs Lalramdinliana (Sairang Dinthar)
LIGHTWEIGHT
Zonunzira (South Lungpher) vs C Rualthankhuma (Farkawn)
LIGHTHEAVYWEIGHT
Daniel Beipasasa (Siaha) vs Batab Chetia (Assam)
LIGHTWEIGHT
HC Lalramfela (Chawngtlai) vs Swarupam Bhattacharjee (Assam)
BANTAMWEIGHT Laldinsanga (Lunglei) vs Adarsh Kamei (Assam)