ICC Men’s T20 World Cup khelh mekah, Nilaini khan India chuan run 5 in an ram thenawm Bangladesh an hneh a, semi-final an hnaih zel.

India hian Super 12 round-ah hian match 4 khel tawhin, vawi thum an chak a, South Africa chiah hneh loh an la neia, Group 2-ah point 6 neiin India hi hmahruaitu an ni.

Toss-ah Bangladesh chakin, bowl hmasak an thlang a, bat hmasa zawk india in run 184 siamin wicket 6 an hloh. Target a sang viau a, Bangladesh tan pawn huphurhawm niin a lang. Nimahsela, Bangladesh in an bat ve leh a, Litton Das a che pui rem rem hle a, ball 27 atangin run 66 ngawt a siam.

Ruah sur in a tih buai avangin DLS Method hmangin over 16 chiah khel tura tih niin, chak turin Bangladesh hi run 151 mamawh tura siamrem sak an ni. Ruah sur hma hian Bangladesh hian wicket an hloh lova, DLS Par score-ah phei chuan 17 runs in hma an hruai hial.

Ruah a sur zawh hnuah an khelh lehah Bangladesh hian wicket an hloh ta mawlh mawlh mai a, an target an um phak ta lo a ni.

India tan Virat Kohli a che tha lehpek hle a, ball 44 a hmachhawn atangin run 64 a vaw chhuak a, a out lo bawk. Tun tournament-a che tha lo thin tak KL Rahul chuan Bangladesh lakah hian ball 32 atangin half century a siam ve bawk.

Indian bowler zingah Hardik Pandya leh Arshdeep Singh te chuan wicket 2 ve ve an la a, Mohammed Shami chuan wicket khat a la bawk.

Bangladesh tan Hasan Mahmud chuan wicket 3 a la a, Shakib Al Hasan chuan wicket hnih a la bawk. Bangladesh lamah Litton Das chuan tun siam hnem berin, run 60 a siam a, Narul Hasan chuan ball 14 a hmachhawn atangin run 15 a siam bawk a ni.