Cristiano Ronaldo chuan khelmual chhunga mi chungnung a nih zia a lantir thin a, tunah chuan milembu lamah mi aia chungnung a nihna a lantir leh tawh a ni.

Juventus star Cristiano Ronaldo channa milembu an siam thar a, hetah hian thiltihtheihna te a nei a, amah leh a pawlte chu Striker Force 7 tiin an hming an phuahsak a. Anni pawl hian sual dona kawngah hma an la chho thin dawn a ni.

Striker Force 7 milembu hi bu khat £7.50 (Rs. 681.88) man zel a ni dawn a, collector’s item chu £15 (Rs. 1,363.77) a lei theih a ni dawn bawk a ni.

Portuguese forward hian thuihhruai a nei a, chhangchhepa, fa pali nei tawh chuan football khelh a thiamna chu he milembuah hian a hmang tangkai tel viau dawn a. Mipui hmuh theiha tlem azawng an pholan tawhah chuan War of the Worlds ang deuhin an inlan a, van sang atangin misual an rawn tla thla a, Ronaldo chu misual do tur hian an pun vat a ni.

Ronaldo chuan a sana chu a hmet a, superhero angin a rawn inthlak a, a kawr hmaah chuan 7 a inziak nghe nghe a. A thuihhruaite nen tang kawpin misual chu an bei vat a, Ronaldo chuan robot ang deuh, ball chu misual lamah a pet phei vel a ni.

A channa milembu thar tur chungchang sawiin Ronaldo chuan, “Football-in khawvel hmun hrang hranga mi chi hran hran, nunphung inang lo tak tak, sakhaw hrang hrangte a thlun zawm thei ang bawkin milembu tha tak pawhin mi a thlun zawm thei a ni tih hi ka ring nghet tlat a ni,” a ti.

“Hetiang taka mi a thlun zawm theih avang hian tuna milembu thar tur pawh hi ka phurpui khawp mai a. Football leh superhero inkawptira mi tana ennawm leh boruak tha siam thei tur an ngaihtuah chhuak hi thil tha tak niin ka hria,” a ti bawk.

Cristiano Ronaldo hian English mipui hmelma nih a hnaih chho viau mai a, Three Lions leh Portugal te chu nipui huna Nations League khelh turah an inhmachhawn dawn a. Portugal team boss Fernando Santos chuan June thlaa an inkhelh hunah Cristiano Ronaldo chu ram tan a inkhel leh tawh dawn niin a sawi a ni.