India football team captain Sunil Chhetri chuan vawiinah hian kum 37 a tling chiah a, kum khata a upat belh niah hian a chanchin thenkhat han tar lang ila.

Indian Super League club Bengaluru FC leh India team captain ni thei Sunil Chhetri hi August 3, 1984 ah khan Secunderabad, Andhra Pradesh (Tuna Telangana) ah a piang a, a naupan lai atanga football ngainatu a ni a. 2002 kumah khan Mohun Bagan atangin bul a tan a, a hnuah JCT zawm lehin, hetah hian game 48 khelhah goal 21 a thun thei a. 2010 ah khan Major League Soccer club Kansas City Wizards a zawm a, India ram atanga hmun danga khel thei pathumna a ni.

India ramah a kir leh a, I-League lamah lutin Chirag United leh Mohun Bagan te chu a zawm a. He mi hnuah hian ram pawn lamah a kal leh a, Portugal ram lam panin Primeira Liga club Sporting Clube de Portugal a zawm a, an club reserve team lamah hun a hmang a ni.

2007 kumah khan India aiawhin a khel tan a, 2007, 2009 leh 2012 ah te India chu Nehru Cup ah a champion pui a, hei bakah hian 2011 SAFF Championship title pawh a lakpui bawk a. 2008 AFC Challenge Cup title lakpuiin, kum 27 chhunga a vawi khatna atan AFC Asian Cup khel turin an tlin theih phah a. 2011 ah khan AFC Asian Cup ah Sunil Chhetri chuan goal 2 a thun nghe nghe a ni.

Chhetri chu vawi 6 ngawt mai AIFF Player of the Year atan an thlang tawh a, 2007, 2011, 2013, 2014, 2017 leh 2018-19 ah te an thlang a, he chawimawina hi amah aia dawng hnem an la awm lo a ni.

Ram tana game 118 a khelh tawhah Chhetri chuan goal 74 lai mai a thun tawh a, match khata goal 0.63 zel thun ang niin, match tina goal thun tam lamah hian Cristiano Ronaldo leh Lionel Messi te chu a khum thei a. Cristiano chu match tinah goal 0.61 thun ang a ni a, Messi chu match tinah goal 0.5 thun ang a ni bawk.

Sunil Chhetri hi India tana goal 50 thun thei hmasa ber a ni a, football a tuipui hi thil mak a ni hran lo a, a nu Sushila Chhetri bakah a phirpui pawh football khel thin an ni hlawm a, Nepal National Football team-ah te pawh an lo tel tawh thin a ni.