Arsenal chuan hnehna nen tun season Champions League bul an ṭan a, Athletic Club an tlawh a, Martinelli leh Trossard te goal hmangin si hnih faiin hnehna an chang.
Estadio de San Mamés-ah goal a lut har hle, first half-ah mikhual Arsenal an khel ṭha a, Madueke a tal na hle. Hetih lai hian goal erawh an khung hleithei lo. Chance an insiam nual a, goal hlauhawm tak erawh first half-ah a awm lem lo.
Second half-ah Mikel Arteta chuan Viktor Gyokeres leh Eberechi Eze te la chhuakin, Leandro Trossard leh Gabriel Martinelli te a dah lut a, anni pahnih hian goal an thawkchhuak ta a ni.
Minute 72-ah halfwayline aṭangin Trossard chuan Martinelli-a tan ball ṭha tak a pe, ani hian chak takin a tlanpui a, goalkeeper chiah a hmachhawn tawh tihin keeper kut leh ke karah a pet goal.
Minute 87-ah Trossard chuan goal a khung ve leh, Martinelli assist a ni a, mual veilam sir aṭangin Martinelli chuan ball la lutin, box chhunga awm Trossard-a tan a pe a, ani hian a shot a, Athletic Club goal ban pet perin a goal zui ta a ni.
Mikel Arteta chuan substitution a siam fuh hle, goal an khung ve ve a, an goal khung tur an insiamsak ve ve bawk. Hetih lai hian anni pahnih hi Arteta chuan inkhelh bul a ṭantir chho kher lo maithei.
Spanish coach hian a player thar Eze chu Martinelli aiin a chhawr nasa ta zawk a, Trossard pawh inkhelh bul a ṭantir ta meuh lo bawk. Belgium international hi season hmasa khan game 56 lai a khel a, tun season-ah erawh bench aṭangin a lut ta fo mai.
Arsenal boss Mikel Arteta chuan, "Inkhelh bul ṭantu leh bench aṭanga lut te hi an pawimawh dan a inang reng. Goal khung hi a pawimawh a, inkhelh bul ṭantu emaw bench aṭanga lut emaw pawh nise, goal khung a pawimawh ber a ni.
"Game a ṭan dana zirin game kan siksawi ṭhin. Athletic Club kan hmachhawn danah ka lawm em em a ni," tiin a sawi.
Arsenal hian Champions League match-ah hian an player pawimawh Martin Odegaard, Bukayo Saka leh Kai Havertz te chu inhliam avangin an chhawr thei lo a, William Saliba pawh bench-ah a ṭhu nghe nghe.
"Player tin te hian inkhelh an chak em em, inkhel loa an awm hian kei pawhin hrehawm ka ti hle bawk. Line-up kan han siam apiang hian player ṭhahnem tak chu an hnual ve ṭhin a ni.
"Bench-a ṭhute pahnih Martinelli leh Trossard te ka en a, inkhelh an duh a, an inpeih tih ka hmu a, ka luhtir ta a ni.
"Inrintawkna nen an rawn khel a, an inkawp fuh em em bawk nen, tun season-ah player ṭangkai tak an ni chho leh dawn tih a lang a, ka lawm hle a ni," tiin Arteta chuan a sawi bawk.