Arsenal boss Mikel Arteta chuan January transfer window inhawn chhung hian striker an zawn thu a sawi chhuak. 

An hmatawng Bukayo Saka chu hamstring hliam avangin a chawlh rei a ngai a, Gabriel Jesus pawh khup hliam avangin a chawl rih deuh dawn bawk.

Gunners hian a zawnin a kum thum nan Premier League title lak tumin hma an la leh mek. Hmahruaitu Liverpool chu point 6-in an phak lo mek a, player inhliam an nei neuh neuh bawk.

FA Cup atangin Manchester United-in an pet chhuak a, Carabao Cup Semi final 1st leg-ah si hnih faiin Newcastle United lakah an tlawm bawk. Goal khung thei player an mamawh a, chu chu Arsenal hian an zawng mek a ni.

"Tum chiang tak kan nei. Kan player pawimawh pahnih Bukayo Saka leh Gabriel Jesus te an inhliam. Goal khung lamah harsatna kan tawk, player kan indaih lo bawk, hmatawng lamah harsatna kan tawk mek.

"Kan player pawimawh te kan chhawr theih loh chhunga kan chhawr tur player tha kan mamawh. Uluk takin kan hawi kual a, kan mamawh tak, kan team-a danglamna thlen thei tur kan zawng mek a ni," tiin Mikel Arteta chuan a sawi.

Arsenal leh RB Leipzig striker Benjamin Sesko te sawi zawm an ni mek a, Wolves forward Matheus Cunha pawh Arsenal hian an ngaihven nia report a ni. Chutih laiin Arteta hian an player ngaihven erawh a sawi chhuak duh rih lo thung.