Tun nipui bazar zet chu Newcastle United an hnawng reng mai. Tunah pawh Wolves lamin an lo hnar leh ta bawk. 

Newcastle United chuan Wolves striker Jorgen Strand lak chhuah tumin hma an la a, a manah £50million lai an thehchhuak nghal. Hetih lai hian Wolves chuan Newcastle United dawrna hi an lo hnar niin David Ornstein chuan a tarlang.

Wolves chuan an striker Jorgen Strand Larsen dawrtu reng reng hnar vek an tum a, lo hralh ta nise, striker dang zawn lehna hun an neih tawh dawn loh avangin Wolves chuan man to taka rawn diltu te pawh an lo hnar a ni.

Newcastle United hian £50m an thehchhuak a, hetah hian add-ons a tel lo bawk. Inbiakna chu kalpui ni mah se, official taka inbiakna erawh a awm lo a, an inbiak tak tak hmain Wolves chuan an hnar ta hmak zawk a ni.

Kum 25 mi Strand Larsen hi Newcastle United chuan Alexander Isak thlakna atan an duh niin a lang a, ani hian Newcastle United chhuahsan a tum reng a, a thlakna tur Newcastle United hian dap kual viau mah se, a thlakna tur an hmu thei si lo.

Magpies hi tun nipui bazarah hian an hawi kual ve nasa hle. Isak chuan chhuah a tum tlat si a, hei vang hian striker an dap kual nasa. Brentford atangin Yoane Wissa lak an han tum a, inbiakna pawh an kalpui viau hman.

Newcastle United hian Wissa manah £35million bakah add-ons £5million thehchhuak mah se Brentford lamin an lo hnar.

RB Leipzig atangin Benjamin Sesko lak an tum, club pahnih te chuan inremna nei mah se, Manchester United an rawn lang a, Sesko chuan Old Trafford lam a thlang ta bawk.

Tin, Liam Delap leh Joao Pedro te pawh nipui bazar tir lamah khan an ngaihven a, inbiakna kalpui thui viau tawh mah se, Chelsea an ngam ta lo a ni.

Strand Larsen hian kum 2024 nipui lai khan Celta Vigo atangin Wolves a pan a, an inleina kha €27m vel nia report a ni. Season liamta Premier League-ah vawi 34 a inlan a, goal 14 khungin, assist vawi 4 a nei a, kum 2029 thleng Wolves-ah contract a nei a ni.