Old Trafford-ah Tottenham chuan Manchester United an tlawh a, mikhual team hian si thum faiin hnehna an chang.

Tottenham hi an game hnuhnung 4-ah hnehna an chang ta vek a, United erawh tun season Premier League-ah vawi 3 lai an tlawm ta a, khelh 6 atangin point 7 chiah a la hlawhchhuak.

Old Trafford-ah mikhual team Tottenham an tlangnel hle, goal pawh an khung hma.

Rashford-a ball hloh chu Van de Ven chuan changin, chak lutukin United goal lamah a tlanpui. Box veilam sir atanga a cross chu changtu nei lo Johnson chuan awlsam takin far post atangin a chhuih lut.

Maddison a tlawh avangin first half tawp dawnah Bruno Fernandes hnawhchhuah a ni a, Bruno kha a tawlh palh a, a tum aia sangin a ke a khai niin a lang. Referee Chris Kavanagh chuan direct red card a pe ta a ni.

Second half tantirah Tottenham chuan an goal hnihna an khung a, Johnson-a cross chu hnai tak atangin Kulusevski chuan a volley goal a, minute 77-ah set piece atangin Solanke chuan Spurs goal thumna a khung a, 3-0 in mikhual an chak ta a ni.

First half-ah Tottenham an chungnung a, chance pawh an nei hnem hle. Johnson chuan United goal ban a pet per a, Maddison-a pet tha lutuk chu Onana chuan lo dan sakin, Romero pawhin a volley goal teuh hle bawk.

First half-ah Zirkzee shot chu Vicario chuan a lo dan sak a, mual veilam sir atanga Rashford-a cross chu Garnacho chuan lo volley-in, Spurs goal post a per bawk.

Second half-ah kim loin United khel mah se, na takin an nawr chance hlauhawm pawh an nei ve nual. 

Andre Onana che tha lo selang chuan United hian goal 7 emaw lai an chhuah a rinawm, tha tak takin vawi hnih Werner a dang a, hun tawp dawnah Solanke a dang bawk.

Table-ah Manchester United chu 12-na an ni ta a, vawi 6 khelh atangin vawi 2 hnehna an chang a, vawi 3 an tlawm a, vawi khat an khingpui an inhnehtawkpui.