Harry Kane chungchangah Bayern Munich leh Tottenham te chu an inbe mek, hetih lai hian Ange Postecoglou  chuan defence lam thawmthat a tum mek bawk.

Bayern Munich chuan Kane hi lak luh an tum ruh hle a, Spurs chairman Daniel Levy an inhmuhpui hnuah a vawithumna atan dawrna an siam leh dawn nia report a ni. 

Bayern Munich lamin Kane an la dawn tih thu thang a awm mek lai hian, Tottenham chuan defender lam pawh an la melh zel a, Wolfsburg defender Micky van de Ven an be mek niin media-te chuan an tarlang.

Dutch defender hi Wolfsburg chuan £30million vel an chhiar niin media te chuan an tarlang a, club pahnihte inkarah erawh inremna a la awm lo.

Hetih lai hian Netherlands Under-21 international hi August ni 13-ah Spurs tan a inlan hman beisei a ni thung.

2022-23 season chhung khan Van de Ven hian Wolfsburg tan game 36 a khel a, Liverpool lam pawhin an ngaihven ve reng. De Telegraaf-a a interview tumin England-a khelh a duh thu a lo sawi chhuak tawh bawk.

"Premier League khelh hi ka chak ber a ni thin, a chhan chu club lian tak tak inelna a ni a, khawvela competition ropui ber anga ka hmuh a ni,"tiin Van de Ven chuan June thla khan a lo sawi tawh.

Tottenham hian centre-back Edmond Tapsoba chungchangah pawh Bayer Leverkusen chu an inbiakpui tho a, Van de Ven hi tun nipui bazara lak an tum ber nia report a ni.