Sunday zan Premier League inkhelah London derby kan hmu a, North London club Tottenham chuan West London club Chelsea lo mikhualin, Tottenham hi si hnih faiin an chak.
Tottenham Hotspur Stadium-ah hian Oliver Skipp leh Harry Kane te chuan goal khat ve ve an thun a, Tottenham hian point thum pawimawh tak an hlawhchhuak.
Chelsea hian khelh 24 atangin point 31 bak an la hlawchhhuak lova, 10-naah an awm chhunzawm zel. Tottenham hi palinaah an awm mek a, khelh 25 atangin point 45 an hlawhchhuak tawh a ni.
Chelsea hi an che chhe chhunzawm zela, an game hnuhnung 16 atangin vawi hnih bak chak an nei lova, vawi 10 ngawt an tlawm. Kumin 2023 chhungin Chelsea hian game 11 an khel tawha, vawi 1 bak an la chak lova, vawi 6 an tlawm tawha, goal 4 chiah la thunin, goal 13 an chhuah tawh thung.
Minute sawm an khelh hma deuhin Chelsea in chance tha tak an insiam nghala, Enzo Fernandez chuan box chhungah ball tha zet vawrh lutin, Joao Felix lo awm mah se, Felix hian ball a khawih phak lo hret. Minute sawm chuang an khelhin Felix hian chance a nei leh a, box pawn atangin a shoot. Felix-a shot hian Tottenham goalkeeper Fraser Forster a zawn hle a, Forster hian harsatna liantham nei lovin a lo save. Felix a chance neih hnu lawk hian Chelsea defender Thiago Silva chu a inhliam avangin lak chhuah a ni a, a aiah Wesley Fofana dah a ni.
Darkar chanve an khelh tlin hma deuhin Tottenham in hma an hruai teuh hle a, Hojberj chuan box pawn hret atangin ball a pet a, shoot tha viau mahse Fofana chuan a lo tlawh sawn saka, si ban a pet per. Half time hma deuhin Hakim Ziyech chuan mual veilama awm Raheem Sterling ball a pe a, Sterling hian cut lutin, box chhung vel chiah atangin a shoot a, mahse a shot chu Forster-a'n a lo save.
First half injury time ah team hnih player te an inti buai deuh nak nak a, referee chuan Hakim Ziyech hnawtchhuak zet mah se, side monitor-a a en hnuah red card hi la letin, Ziyech hi yellow card a pe ta zawk a ni. First half ah goal lut awm lo mah se, second half an tana, minute khat pawh an khelh pum hmain Skipp chuan box pawn atangin goal ah ball a peta, Chelsea keeper Kepa chuan lo khawih mah se a nam chhuak zo lova, ball hian cross bar perin goal ah a luta, si khat faiin first half a shot on target nei lo Tottenham in hma an hruai.
80mins hnuah Tottenham in goal an thun belha, Heung-min Son chuan corner atangin ball a vawrh luta, Eric Dier chuan lo tauh pialin, far post lamah hnai set sawt atangin Kane chuan goal-ah a lo khunga, 2-0 in inkhel a tawp.
Chelsea hi Leeds United hmachhawn turin an inbuatsaih dawna, tun kar Inrinni zanah Leeds hi Premier League inkhelah an mikhual dawn. Tottenham hian tun kar Nilaini zanah laiah FA Cup fifth round an khel dawna, Sheffield United an tlawh thung dawn a ni.
