Roma Head Coach Jose Mourinho chuan a lo enkawl tawh club zawng zawng zingah, Tottenham chiah chu thinlung taka a pawh tak tak loh awmchhun a nih thu a sawi chhuak. 

Kum 60 mi hian kum 2019 November thla atanga kum 2021 April thla thleng khan Tottenham a enkawl, a season khatnaah league-ah parukna a nihpui.

A season hnihnaah pasarihna a nihpui a, Carabao Cup final-ah Manchester City nen an inhmachhawn dawn, final an khelh hma chiahin Daniel Levy chuan a ban ta a nih kha.

Tun season Europa League final lut Jose Mourinho chuan, "Tottenham fan-te pawhin ka sawi dik an tih ka ring, ka club enkawl tawh zawng zawng te nen inkungkaihna tha tak kan nei thin, Tottenham erawh, anni chiah kha thinlung taka pawh loh ka neih chhun an ni.

"Covid lai a nih avangin Stadium kha a ruak thin a, kha vang pawh kha a ni bawk a. Tin, Mr Levy khan final match min enkawltir lo a, trophy min chawitir lo. Khang erawh a chhan pakhat ve chauh a ni," tiin a sawi.

Coach a nih chhungin Mourinho hian club 10 a lo enkawl tawh a, Manchester United, Chelsea, Real Madrid leh Inter Milan te chu club langsar ber te an ni.

A hunlai chuan coach hlawhtling ber zinga mi a ni, trophy 26 lai a chawi a, a club enkawl tawh te zawng zawng trophy a chawipui vek, Tottenham tiam lohin.

Season liamta khan AS Roma chu Europa Conference League no mawi a chawipui, tun season-ah Europa League final a luhpui leh a, Sevilla nen final an khel dawn a ni.

Tottenham erawh coach an zawngin an buai mek, Feyenoord boss Arne Slot chu an dawr hlawhtling tep, mahse Slot chuan Tottenham enkawl loh a thlang leh ta si a.

Kum 44 mi hian Feyenoord chu tun season Eredivisie title a kalpui, Dutch club chhuahsan loh a thlang ta zawk a. Roberto De Zerbi leh Luis Enrique te chu Tottenham chuan an ngaihven leh mek nia report a ni.