Tottenham chuan tun season tawp thleng atan Arnaut Danjuma chu Villarreal atangin an lalut a, tun thlasik bazar chhunga an player lakluh awm chhun a la ni.

Dutch forward hi Everton in lakluh an tum hle a, Everton hi a zawm ngei dawn emaw tih hnuah Tottenham hian an rawn 'hijack' a, Spurs hian an duh chuan Danjuma hi season tawpah an lei zui thei a ni.

Tun kar Thawhtanni mai pawh khan Sky Sports leh English chanchinbu dangte chuan Danjuma hi Everton-a lut tur angin an ziak a, mahse Everton hian an manager Frank Lampard an ban tak avangin Danjuma an lak tumna pawh hi a tlawlh ta niin an sawi.

Kum 25 mi hi England-ah a mikhual lova, kum 2019 atanga kum 2021 chhung khan Bournemouth ah lo khel tawh thinin, Cherries tan hian game 52 atangin goal 17 a thuna, kum 2021 khan euro maktaduai 25 bawr vel sengin Villarreal hian an lalut.

Season hmasa khan Villarreal in UEFA Champions League semi-final an thleng a, hemi atan hian Danjuma hi an player pawimawh tak niin, season hmasa khan competition zawng zawngah Villarreal tan hian goal 16 a khung.

Antonio Conte-a team hi tlarhma lamah an squad a chhah chho zel a, Dajuma bakah hian Harry Kane, Heung-min Son, Dejan Kulusevski, Richarlison leh Lucas Moura te an nei.

Tottenham hian Premier League season kal mekah game 21 khel tawhin, point 36 an hlawhchhuak tawh a, pangana dinhmun an luah mek a ni.