Al Thumama Stadium-ah Spain chuan 7-0 laiin Costa Rica an sawp. Spain tan Ferran Torres chuan goal hnih khungin Olmo, Asensio, Gavi, Soler leh Morata ten goal khat theuh an khung.
Group E-ah hian Spain chu group hmahruaitu an ni a, Germany hnehtu Japan chu pahnihna niin; Germany leh Costa Rica ten point an la hlawhchhuak ve lo a ni.
Spain 7-0 Costa Rica
(Olmo 11', Asensio 21', Torres 31' pen, 54', Gavi 75', Soler 90', Morata 90+2')
Inkhelh tan atangin Spain-in game an thunun nghal, tiki taka game mawi tak an rawn khel chhuak a, Olmo chuan chance tha tak a hlah hnu lawkah goal a khung.
Minute 11 a ni a, Gavi leh Olmo te attacking third-ah an in one-two mawi hle, Gavi chuan a kangin box chhungah ball a pet lut, hei hi Olmo chuan mawi lutukin a la thla, a virpui nghal bawk, Keylor Navas chu rawn phar duai mah se Olmo hian a kang bawkin a pet ve leh a, a goal mawi hle.
Minute 21-ah Spain chuan Asensio hmangin an goal hnihna an khung, mual veilam sir atangin Jordi Alba chuan ngal chenah ball a cross, hei hi box chhung atangin Asensio chuan a ke veilam hmangin a pet nghal, Navas chuan khawih fuh mah se a dang zo lo, si hnih faiin Spain-in hma an hruai.
Spain-in an nawr chhunzawm zel a, minute 31-ah penalty atangin Ferran Torres chuan Spain goal thumna a khung. Box chhungah Duarte chuan Jordi Alba a ti tlu, referee chuan penalty a ham a, he penalty hi Ferran Torres chuan goal-ah a chantir. Half time a nih chuan si thum faiin Spain chuan hma an hruai.
Second half tan a ni a, Costa Rica chuan nawr ve deuh mah se Spain-in an game-ah an hruai lut leh, second half an la khel rei lo, minute 54-ah Ferran Torres chuan a goal hnihna leh Spain goal lina a khung.
Box chhungah Torres chuan ball um lutin goal hnaih takah a turn, a ke veilamin a shot a, Navas-a zak hnuaiah a lum lut leh, 4-0 laiin Spain chuan hma an hruai ta.
Minute 75-ah Gavi chuan mawi lutukin Spain goal 5-na a khung. Mual veilam sir atangin Alvaro Morata chuan ball a vawrh, hei hi box chhunga tlan luh pahin kum 18 mi Gavi chuan a volley, lei hrulah thlawk pheiin goal post a per hnuin a goal mawi hle.
Minute 90 a ni a, Spain chuan Soler hmangin an goal 6-na an khung. Mual dinglam sir atanga Nico Williams cross chu Navas chuan lo khawih perin hei hi box chhung atangin Soler chuan a chhuih goal a, Spain hian an la duhtawk mai lo.
90+2 minute-ah Alvaro Morata chuan Spain goal hnuhnung ber leh goal 7-na a khung. Olmo nen an in one-two, Olmo pass tha tak chu Morata chuan box chhung chiah atangin a ke veilamin bottom corner-ah a chhuih goal, hun a tawp chhunzawm a, 7-0 laiin Spain chuan hnehna an chang ta a ni.
Gavi chu Spain tana World Cup-a inlan thei naupang ber a ni a, kum 18 mi lek la niin, kum 2006-a Fabregas-a record chu Gavi hian Qatar World Cup-ah a rawn khum ta a ni.
Spain game a mawi, an tlan hnem, an in pass hnem bawk. Barcelona vanglai tak taka tiki taka game ang mai khan dawhthei takin game an sawikual vel. Chance an hmuh veleh rang takin goal-ah an ri zawt thin.
Spain hi FIFA Rankings-ah 7-na an ni a, Costa Rica erawh 31-na an ni. An rankings atang pawh hian an inthlau a, game-ah pawh an inthlau hle. Costa Rica hian inkhelh chhung zawngin shot vawi khat pawh an nei lo. Spain-in ball possessions 82% lai an nei a, vawi 16 lai shots an nei bawk.
Spain dang turin Costa Rica an thawk rim tawk lo, Spain player-te an tlan hnem a, hemi dang chat tur hian Costa Rica player-te an tlan tam tawk lo. Hei vang hian Spain team hian hmun thawl an hmu hnem a, goal pawh an khung teuh phah bawk a ni.
Spain boss Luis Enrique chuan hmatawngah Asensio, Ferran Torres leh Olmo te a dah a, midfield-ah senior player Busquets chuan midfielder naupang pahnih Gavi leh Pedri te a uap bawk a.
Asensio chu false 9 ang tein a awm a, Olmo nen a laiah an inluh chhawk thin. Mual dinglam leh veilam sir kil ber thlengin Spain team hian ball an khalh kual a, hei hi Costa Rica lamin an chelh lo a ni ber mai.
Group E-ah match pakhat zawkah Japan chuan 2-1 in Germany an hneh a, Spain chu group hmahruaitu niin, Japan-in an dawt a. Germany leh Costa Rica ten point an la hlawhchhuak ve lo.
Germany hian Spain leh Costa Rica an la hmachhawn dawn, Football ram ropui Germany tan knock out stage lut tur chuan an match pahnih la khelh turte hi final ang maia an khelh a ngai tawh dawn a ni. Spain leh Germany inhmachhawn hun a nghahhlelhawm khawp mai, Japan an hneh loh hnuah Spain hi an hneh thei ang em? An Group hi a hmuhnawm dawn e.