Social media-ah Ronaldo-a'n follow tu a ngah belh zel

22nd September 2022, 09:09PM

Cristiano Ronaldo instagram account follow-tu an pung tual tual, social media platform hi khawvela footballer tha ber zawnna a ni lo a, Ballon d'Or dawng tur zawnna pawh a ni lo.

Chutih laiin mipuiin kan duh zawng leh kan vei zawng kan sawi chhuahna platform tha tak a ni a, kan ngaihsan zawng kan tarlanna hmun a nih bawk avangin social media-a follow-tu ngah hi heti zawnga chhut chuan a ropui vet vet hle mai.

Nielsen's influencer measurement tool chuan 2022 Qatar World Cup khel tur zingah follow-tu ngah, follow-tu pun chak dan leh an account hlut zawngte bakah an thil post pakhat hlut zawng te an chhut chhuak a, Cristiano Ronaldo chu hmahruaitu niin Lionel Messi, Neymar leh Kylian Mbappe ten an dawt.

Football player zingah mai ni lo, khawvela mihring zingah Cristiano Ronaldo hian instagram follower a ngah ber tih chu kan hre theuh tawh ngei ang. Portugal forward follow-tu hi kum liamta khan 47% laiin an pung bawk a, a post pakhat lek pawh hi a hlut zawng chu $3.5m niin Nielsen Sport chuan a tarlang.

Manchester United player Jadon Sancho chu most influencial English player a ni a, Barcelona player naupang talent nei tha tak Gavi pawhin follower a nei tam chak kher mai, kum liamta khan 5,165% laiin follower a neih belh.

He chanchin kan buatsaih lai hian Cristiano hian instagram followers 481 Million a nei a, Argentine playmaker Lionel Messi chuan 360 million a nei, ani pawh hi thla 12 liamta khan follow-tu 38% laiin a neih belh a ni. Tin, Messi-a post pakhat hi a hlut zawng chu  $2.6m vel nia chhut a ni.

Top 10 most influential footballers on Instagram at 2022 World Cup-ah hian Neymar chu pathumnaah a awm a, Mbappe chuan a dawt, Neymar hian 178M follower a nei kai tawh a, Mbappe hian 72.5M follower a nei kai tawh bawk. Anni pahnih post hlut zawng hi $1m vel nia chhut a ni.

France leh Chelsea midfielder N'Golo Kante chuan pariatna dinhmun a hauh a, thla 12 liamta chhunga engagement rate nei sang ber (11%) ani ve bawk. Real Madrid forward Vinicius Junior chu top 5-ah a rawn inhlangkai a, season liamta Champions League-ah khan a che tha hle, final-ah pawh goal a khung a nih kha. Kha vang khan nikum chhungin 90% velin followers a neih belh.

Karim Benzema, Paulo Dybala, Kante, Pogba leh Ramos te top 10 ah an awm. Top 10 breakthrough footballers on Instagram-ah chuan Gavi a chungnung ber a, Raphinha chuan dawtin Antony leh Pedri te top 5-ah awm.

World Cup khel tur ram zingah France-in follower an ngah ber a, England, Argentina, Brazil leh Portugal-te pawhin an tluk zo lo.

Les Blues hian tun thlengin 11.7m an nei tawh a, an follower zinga 64.8% hi France rama cheng an nilo bawk. Brazil chuan pahnihna dinhmun luahin follower 11.5m an nei mek a, Portugal-in 10.4m an nei ve mek bawk.

England player zinga huhang nei lian ber chu Jadon Sancho ani a, follower a neihbelh zat punna hi 21% a tling pha. Jack Grealish leh Aaron Ramsdale pawh Three Lions player zinga langsar anni a, follower an nei pung chak ve hle a ni.

Copyright © inkhel.com 2022. All rights reserved.