Liverpool chuan 2024-25 Premier League-a an match hmasa berah si hnih faiin Ipswich Town an hneh a, Jota leh Salah ten goal an khung.
Portman Road-ah Liverpool-in harsatna lian an tawk lo. First half-ah mual neitu an khel tha a, chance hlauhawm vawi hnih khat chu an nei ve, a bak chu Liverpool chan vek a ni kan ti thei awm e.
Second half minute 60 an khelh tlin hma hretin mual dinglam sir atangin Alexander-Arnold chuan tha lutukin a cross a, Jota chuan a tauh goal teuh ther ther. Hemi hnu chiah hian Jota chuan goal a khung ta tho.
Mual dinglam sir atangin Arnold chuan Salah-a tan through ball tha lutuk a pe, Salah chuan lei hrulah a cross a, Jota chuan tihsual nei miah loin Liverpool goal hmasa ber a khung.
He goal a luh atanga minute 5-na lekah Salah chuan goal a khung ve leh. Szoboszlai chuan tha lutukin box chhungah Salah tan a pe a, Salah chuan goal-ah a chhuih lut ve leh a, hun tawp dawn tak takah Salah chuan goal khungna chance tha lutuk nei leh mah se, Walton chuan a lo dan sak.
Liverpool-a a khelh hnuin Salah hian Premier League season game hmasa berah a zawnin goal emaw assist emaw vawi 8 lai a nei a, Premier League opening match-ah goal 9 lai a khung bawk.
Egyptian goal khung khawl Salah chuan, "Hnehna kan chang a, ka lawm khawp mai. Team tana chakna player nih theih te hi a hlu a, season tir game hmasa berah hian ka vannei thei hle a ni, season tluana tha taka khelh chhunzawm theih ka inbeisei.
"Team tana theihtawp chhuah zel ka duh a, a pawimawh ber chu hnehna chan a ni. Goal khung emaw assist neih emaw hi chhunzawm zel ka duh bawk.
"Premier League-a kai thar hmachhawn hi a hautak a, Ipswich kan hmachhawn dawn pawh hian a hautak dawn tih kan hre lawk a ni.
"Kan manager thar game min khelhpui dan chu Klopp-a game nen a inang lo hle. Jurgen kha kan hnenah kum 8 hun a hmang a, a theihna zawng zawng a hlan a nih kha.
"Tunah manager thar kan nei a, khelh dan thar te kan nei a, a danglam hle. Player tin te coach tharin khelh dan min zirtir anga kan insiamrem thiam a ngai dawn, hma kan sawn bek bek ang a, hlim takin kan inkhel thei ang," tiin a sawi.