Kum 2003 a ni a, February thlaah FA Cup atangin Manchester United petchhuah an ni. Dressing room-ah United boss Alex Ferguson chu a thinur tak zet. A thinrimna ber pakhat pawh David Beckham-a chetthat loh vang a ni a.
"United-a a season hnuhnung berah khan David-a work rate kha nasa takin a tlahniam, Real Madrid lamin an duh niin thuthang a awm mek bawk si. Khami tuma kan harsatna ber chu David-a boruak kha a ni.
"Ka awmna atangin feet 12 vela hlaah a awm, kan inkarah chuan ball boot a tlar phei dul a, amah ka sawisel mek lai chuan a rawn pawr ve deuh; ka va pan phei a, ball boot chu ka pet, a mit ko takah a fuh nghe nghe. Min rawn pan ve a, mahse player ten an lo dang a.
"Kei chuan, 'Thu rawh, nang hian kan team nasa takin min tihnual a ni,' tiin ka sawi a," tiin Sir Alex Ferguson chuan kha boruak kha a sawi. Kha thil thlen hnu khan David Beckham chuan Real Madrid a pan ta a ni.
Sir Alex Ferguson hi khawvela football manager hlawhtling ber pakhat a ni a, discipline a vawn that em avangin player tha engemaw zat a chan nghe nghe. Hei vang hian trophy tam zawk a lak loh phah niin amah ngei pawhin a sawi a nih kha. Hetih lai hian team a enkawl dan chungchang hi a chawlh hnu thleng pawhin khawvel fak a la ni chhunzawm ta zel a ni.
Football-ah hian player te chu game-a tha taka an khelh theihna turin inkhuahkhirhna tha tak team leh coach ten an kengkawh thin. Zuk leh hmuam leh ruihtheihthil chungchanga inkhuahkhirhna chu an tih reng reng a nih avangin sawi tel ta lo ila. An rilru leh ngaihtuahna hmun danga la peng theitu thil a lo awm ve thin a, chung atang chuan inthiarfihlim turin coach te chuan an player-te chu an enkawl thin.
Rilru lapeng thei thila inkhuahkhirhna tha tak hi Sir Alex Ferguson-a hi chuan khawng takin a kengkawh a. Hollywood celebrity te anga lar khel lutuk ang chite phei hi chu a duh lo tak zet a ni tih pawh sawi thin. Coach te chuan an player te chu transfer thuleng vak vel chanchinbuin an lo chhuahte chhiar lo turin an ti bawk a, hei vang hian player tam zawk chuan football chanchinthar hi an bih ngai meuh lo nia sawi a ni bawk. Heng zawng zawng hi a chhan chu an game-a an rilru zawng zawng an phek theih nana inkaihhruiana a ni.
Pathian pawhin amah kan biakna dal thei thil reng reng chu a duh lo bur. Eng ber hi nge sual? Tia kan inzawh chuan, kan chhanna ni tlangpui thin chu zu leh drug leh ruihtheihthil bakah inngaihna sualte leh sum ngainat te hi kan sawi tlanglawn ber a ni ngei ang. Hetih lai hian Bible kan chhiar atanga sual kan hriat dang thenkhat chu 'eipuar lutuk' te hi a ni tlat mai. Tin, ei thiang leh thiang lo Pathian chuan a sawi thlap thlap bawk.
Vawksa te hi tui hle mahse a khap tlat, ran thisen ei pawh a khap tlat mai. Heng hi a khapna chhan chu tunah chuan kan chiang tawh hlawm khawp ang le, heng sa thenkhatte hian mihring hriselna nasa takin a khawihchhe thei. Tin, eipuar lutuk pawh hriselna atan a pawi tih mithiamte chuan an sawi chiang fek fawk tawh bawk.
Pathianin mihring khawsak dan tura a duh chu hrisel taka awm hi a ni tih Bible atangin a chiang khawp mai. Hrisel lohna leh natna tam tak hi chu vanduai vanga kan kai a ni, hetih lai hian kan taksa kan duat loh avang leh kan ei leh in avanga natna kan kai chu a tam zawkin kan natna vei mek a ni tih hi kan pawm tlang ang. Natna kan neih hi chuan rilru pawh a fim hleithei lo tih pawh kan chiang a, chungte avang chuan hrisel dan kawng Pathianin Bible hmangin min hrilh hnem hle.
Inngaihna sual leh chapona baka Pathianin a duh loh em em chu rilru fim pu thei lova min siamtute hi a ni tih Bible atangin chiang takin kan hmu. Football player te pawh an coach ten rilru fim leh hrisel nei tura an inenkawl chuan Pathian phei chuan a lo va ngaipawimawh dawn tak em! Zu in te hi sual a ni reng reng hleinem, mahse kan han rui ta chiah a, chhia leh tha hriatna kan hloh ta chiah a, hei erawh Pathian duh loh ber a ni tlat mai.
Arhmul hmanga beng hawlh hi a nuam khawp mai, hetih lai hian nuam kan tih lutuk avanga Pathian kan lo theihnghilh thak phahte a nih chuan; beng hawlh mai mai pawh sual a ni thei tlat. Sum avang hian kan thinlung mit a del thei a, sum kan duh luat avangin thil dik lo tih pawh kan hreh thin ta lo bawk a, hei hi Pathianin a hriat chian em avangin, "Sum ngainat hi sual tinreng bul a ni," tih pawh Bible-ah a chuang kalh a ni.
"Pathian chênna in chu in ni tih leh Pathian Thlarau nangmahniah a chêng reng tih in hre lo vem ni? Mi tu pawhin chu in chu an tihkhawloh chuan, Pathianin anni chu a tikhawlo ve ang; Pathian chênna in chu a thianghlim si a, chu in chu in ni e."(1Korinth 3:16-17)
Taksa hriselna Pathianin a ngaipawimawh hle a, kan sawi tawh angin hei hi a chhan chu rilru fim tak kan put theihnan Pathianin hrisel taka awm turin min duh. Chuvang chuan kan taksa tichhe thei thil chi hrang hrang lakah kan inveng fimkhur anga, hriselna kawng zawh zel turin taksa sawizawi pawh kan uar deuh deuh tur a ni.