Champions League final-a PSG an hneh loh hnuin Inter head coach Simone Inzaghi chuan Italian club hi a chhuahsan ta.

Kum 49 mi Inzaghi hian kum 3 chhung Inter Milan a enkawl a, Serie A title, Coppa Italia vawi 2 leh Supercoppa Italiana vawi 3 a lakpui a, Champions League final vawi 2 a luhpui bawk a ni.

Thawhlehni khan Inter hotute leh  Inzaghi te hi an inkawm khawm a, lung dam tak chungin an inthathen ta a ni.  Inzaghi hian Saudi Pro League club Al Hilal a pan dawn nia report a awm mek a, anni hian May thla khan an manager Jorge Jesus an ban a, khami hnu khan manager an nei leh tawh rih lo a ni.

Tun kar hnih khat chhung lekin Serie A head coach langsar tak tak an chhuak nuk mai. May ni 29 khan Milan chuan Sergio Conceicao an chhuahtir a, June ni 1 khan Atalanta pawhin hun rei tak an rawih tawh Gian Piero Gasperini an chhuahtir bawk.

Kum 5 chhung Lazio a enkawl hnuah  Inzaghi hian kum 2021 khan Inter a zawm a, Inter chu trophy 6 lai a chawipui a, Champions League final vawi 2 a luhpui bawk. Kum 2023 Champions League final-ah khan 1-0 in Manchester City an hneh lo a, kumin UCL final-ah 5-0 laiin PSG an hneh lo bawk.

Tun season liamta kha chu trophy lian chawi theihna hun remchang an bawhpelh. Serie A-ah hma an hruai a, season tawp lamah Napoli an inlehpelhtir, Scudetto an chawi ta lo. Supercoppa Italiana final-ah Milan an hneh lo a, Coppa Italia semi-final ah an tla bawk.