Liverpool striker Diogo Jota leh a unaupa Andre Silva te chetsual dan chu ngun taka an zir chian hnuah Spanish thuneitute chuan an chetsual dan an puang.

Kum 28 mi Jota leh kum 25 mi Silva te hi Zamora khaw hmar thlang lam kawng A-52 ah Lamborghini car hmangin an chesual a, car hi a kang zui a, an boral ta a nih kha.

An chetsual hlima an sawi dan chuan, an hmaa motor tlanpelh an tum a, an car ke a puncture hlauh mai a, an chesual ta niin media te chuan an sawi.

Thawhlehni khan Spain national police te chuan investigation an neihna an puang zar a, Zamora branch of the Guardia Civil leh traffic Division chuan, "Kan mithiam ten zir chianna uluk taka an neih hnuin an zo fel ta a.

"Kawnga an car-in ke hniak a hnutchhiah chu ngun takin chhui a ni a, heta tanga thil lang chiang chu phal chin aia chakin car hi a tlan a ni. Tin, car hi Diogo Jota khalh a ni bawk e," tiin thuchhuah an siam.

Thawhlehni khan Liverpool player te chu Kirkby-ah training nei turin an kir leh ta a, Season hmasa an zawh fel a, chawlh an hman hnua training an neih leh hmasak ber niin, hemi hma ni 3 liamta khan Liverpool player eng emaw zat chu Jota leh Silva vuinaah hian an tel.

Training ground pawnah chuan Liverpool supporter te chuan pangpar leh banner mawi tak tak an hnutchhiah. Tun Pathianni lo awm turah hian Liverpool chuan pre-season match hmasa berah Preston North End an hmachhawn dawn, chhiat an tawh avang hian he match hi kaltlangpui chi a nih dawn leh dawn loh hriat a  la ni lo.