Shkodran Mustafi chu tun hnaiah a tla na lo sawt hle a, Everton laka a khelh chhiat zui leh bawk avangin Arsenal striker hlui Kevin Campbell chuan chhuak tawh tura a duh thu a sawi.

Kevin Campbell chuan Arsenal chu centre-half thar la tura a duh thu sawiin, Shkodran Mustafi chuan a hna a tlin tawh lo niin a sawi a. 2016 atanga Emirates Stadium luhchilhtu Shkodran Mustafi chuan Arsenal tan game 100 chuang chu a khel hman a, Arsene Wenger leh Unai Emery hnuaiah hmun nghet a chang thei viau a, mahse tun hnaiah a chet fuh theih loh em avangin sawisel a hlawh chho hle.

Kum thum chhung North London vela a awm hnua a thil tih thlir letin, a chet that aiin a chet chhiat a tam zawk niin Kevin Campbell chuan a sawi a. Unai Emery chuan transfer window inhawn leh hmasak berah centre-half thar melh vat se a duh thu a sawi chhuak a ni.

Campbell chuan, “A hma daih atangin ka lo sawi tawh thin a, a chang chuan Mustafi hi a che fuh ve thin tho a; mahse, a chet chhiat hi a tam ta mah mah a, Arsenal hian centre-back thar an mamawh tih hi ka ngaihdan a ni a, an mamawh tak tak a ni,” a ti.

“Rob Holding hi player tha tak niin ka hria a, a inhliam vangin a inkhel thei rih lo a, dam thuai thuai se a tha viau a. Tlar hnung lamah mi an mamawh belh chiang a, Dominic Calvert-Lewin khan amah chauh pawhin Arsenal defender te kha a chhaih buai thei viau a, insiam that an mamawh zia a lang chiang hle a. Defender che rang tak, tlan thei deuh, inkhel boruak man zung zung thei an lei a ngai,” a ti bawk.

Arsenal manager Unai Emery chuan Gunners hma lam hun chu anmahni kutah a awm thu sawiin, “Goodison Park-ah beisei kan pha lo tih kan hria a, a hma atangin hna hautak deuh kan hmachhawn dawn tih kan ring sa a, point thum hmuh theihna hun tha kan neih chu kan bawhpelh ta chu ania. Kan khelh leh turah a aia hun tha kan nei turah ngai ila, point thum hlawh chhuah ngei kan tum tawh ang,” a ti.

“Season tawp thlengin game 38 kan khel dawn a, chutiangah chuan kan tan mar pat a ngai a, a tawpa kan dinhmun tur chu kan kutah a innghat lian hle a. Kan inthlahdah chuan dinhmun tha tak kan luah thei lo ang a, theihtawp chhuaha chak ngei tura kan khelh zel chuan a chungnung pawlah kan awm thei dawn a ni,” a ti bawk.