Chinese Super League club Shanghai Senhua chuan an player Qin Sheng chu season tawp thleng a hlawh an tihhniam sak. Senhua leh Tianjin Quanjian inkhelh tumin Sheng hian Quanjian midfielder Axel Witsel chu a rap hlui a, a chet dan mawi lo tak avang hian Senhua chuan an player hi ¥300,000 (£35,000) lai chawi tir tawh mahse hremna na zawk an kengkawh chhunzawm dawn a ni.

Senhua club president Wu Xiaohui chuan thil thleng chungchang sawiin, "Qin Sheng hian season tanni inkhel hmasa berah yelow card a hmuh nghal avangin kan zilhhau tawh a, Senhua nena kan inkhel hma pawh hian uluk takin kan hrilh thlap bawk. Nimahsela ka thu sawi te'n awmzia a nei ta lo a ni," tiin Sheng chuan club hruaitute a zah loh thu a sawi.

China sawrkawrin theihtawp chhuahin an ramah football tihlar a tum a, Europe atangin player lar tak tak lalutin hlawh thahnem tak an pe a, naupang tam takin inkhel an en laia Sheng chet danin Senhua hotute a ti lawm lo hle.

Sheng chungchang sawi chhunzawmin Xiaohui chuan, "A thinrum thut thil tih niin a lang lo, kan club kalphung namnulna lian tak a ni. A chet dan mawi lo tak avang hian kan club mai bakah Chinese football hmel a ti bal a ni," tiin an player Sheng a chhan lem lo hle.

Chinese Super League tan a ni chauh a, game hnih bak khelh a la ni lo. Shanghai East Asia club 16 inelna league-ah hian point 6 hmuin hma an hruai mek a ni.