Sevilla-ah Alex Telles

05th August 2022, 10:08AM

Spanish club Sevilla chuan, Manchester United atangin Brazilian left-back Alex Telles chu season khat chhung atan loan-in an lalut.

Sevilla hian Telles-a hlawh zawng zawng an tum dawn a, season tawpah lei zui theihna an nei dawn lo bawk a ni.

United hian left-back Luke Shaw an nei a, hemi bakah hian tun nipui bazar chhungin Dutch left-back Tyrell Malacia chu Feyenoord atangin an lalut bawk a, hemi avang hian Telles-a tan hmun a awm ta meuh lo.

Kumin World Cup-ah kum 29 mi Telles hian Brazil squad-ah tel ngei a tum hle a, United-a hmun a chan tam dawn loh avangin, a inkhelh tam theihna tur lam a pan a ni.

United hian kum 2020 khan Portuguese club FC Porto atangin Telles hi an lalut a, a manah euro maktaduai 15 an seng a ni.

Copyright © inkhel.com 2022. All rights reserved.