Benjamin Sesko man chungchangah Manchester United leh RB Leipzig te chuan inremna tluantling an nei ta niin The Athletic chuan a tarlang.

Manchester United hian Sesko manah hian €76.5million (£66.4m; $89.1m) bakah add-ons €8.5m an thehchhuak a, hei hi RB Leipzig chuan lo pawmin, Leipzig chuan Sesko chu Manchester pan an phalsak ta a ni.

Thawhlehni khan Newcastle United chuan Sesko manah €82.5m bakah add-ons €2.5m an thehchhuak a, kha kha Leipzig lamin lo pawm mah se, Sesko chuan Old Trafford pan a duh avangin United lamin an chang ta zawk a ni.

Nilaini khan Sesko leh Manchester United te chuan mimal thilah inremna an lo nei tawh bawk a, Sesko hian kum 2030 thleng atan Old Trafford-ah contract a ziak ang.

Season liamta khan Sesko hian competition hrang hrangah RB Leipzig tan goal 21 a khung a, German club tan hian game 87 a khel tawh a, goal 39 a khung tawh bawk.