Newcastle United chuan Benjamin Sesko lakchhuah tumin RB Leipzig an dawr ta a, Sesko manah hian €80million an thehchhuak niin The Athletic chuan a tarlang.

Darkar 24 liamta khan Newcastle United hian RB Leipzig an dawr a, €75m (£65.5m; $86.9m) bakah add-ons €5m pek an inhuam.

Alexander Isak-a hma hun a chiang lo hle a, Newcastle United chhuahsan a duh thu a sawi tawh. Hei vang hian Magpies pawhin Isak thlakna tur rang takin an dap nghal char char a ni.

Liverpool pawhin £110m thehchhuakin Isak lei an tum a, hei hi Newcastle United chuan zirtawpni khan an lo hnar. 

Manchester United pawhin Slovenia striker hi an ngaihven a, official-in indawrna la awm lo mah se, United palaite chuan Sesko an dawr nia report a ni.

Hetih lai hian Newcastle United chuan  €80million lai Sesko mana thehchhuah an inhuam chuan, United hi an inhnuhdawh mai a rinawm a, hetiang zat zat hi Manchester United chuan thehchhuah an phal a rinawm loh.

A pawimawh ber chu Sesko-a duhthlanna a ni a, Sesko hian thutlukna a siam hunah a chiang chho dawn a ni. Inrinni zing khan report thenkhatin an tarlan dan chuan, Sesko hian Newcastle United pan a duh niin thu an vawrh darh a, hei erawh thu chiang a la awm lo a ni.

Sesko hi Arsenal pawhin an lo ngaihven viau tawh a, mahse Viktor Gyokeres-a lam an hawi a, thla hmasa khan €63.5million (£54.8m; $74.2m) bakah add-ons €10m-in an lei ta a ni.

RB Leipzig-a Sesko-a contract hi kum 2029 thleng daih a ni a, nikum mai khan contract thar a ziak a, sum tam tak nena dawrtu an dawn chuan, Leipzig hian chhuahtir an hnial dawn lo a ni.

Slovenia International hian kum 2023 khan Red Bull Salzburg atangin RB Leipzig hi a zawm a, Leipzig tan game 87 atangin goal 39 a khung tawh a, assist vawi 8 a nei tawh a ni.