Arsenal chuan Benjamin Sesko lak tumin RB Leipzig an dawr tan ta niin Sky Germany chuan a tarlang a, Arsenal hian pawisa nen Leipzig hi an dawr nghal lo a, lak chhuah dan a awm thei em tih tih hre turin Leipzig hi an dawr a ni.

Nikum nipui lai khan Sesko hian RB Leipzig-ah contract thar ziakin, a contract hian kum 2029 thleng a awh. Nikum nipui lai khan Arsenal chuan Sesko hi an lo ngaihven tawh a, kumin January thla pawh khan an ngaihven nawn leh a, tunah erawh lak tumin theihtawp an chhuah chho dawn a nih hmel.

Budesliga club pawh hian an striker hi sum an phut zat anga rawn dawrtu an awm a nih chuan, chhuahtir an hnial lem lo niin Sky Germany chuan a tarlang a, Leipzig hian season tharah Champions League an khelh dawn loh avangin Sesko pawh hian chhuah a hnial lo nia tarlan a ni.

January thla khan Arsenal chuan Sesko hi an lo dawr uluk hle nia tarlan a ni a, hetih lai hian season laklawh laiin Leipzig lamin chhuahtir an phal lo a, hei vang hian Sesko-a agent pawhin Leipzig ngenna a ngai pawimawh a, transfer a thleng ta lo niin Sky Germany chuan a tarlang.

Sesko hian season liamta khan competition hrang hrangah RB Leipzig tan goal 21 a khung a, assist vawi 6 a nei. Champions League-ah pawh goal 4 a khung nghe nghe. Arsenal hian Sesko mai bakah Sporting CP atangin Viktor Gyokeres lak luh dan an dap mek niin media te chuan an tarlang bawk.