Manchester United striker hlui Louis Saha chuan midfield an thawmṭhat loh chuan Benjamin Sesko a talbuai deuh tur thu a sawi.
Kum 22 mi hian tun nipui bazarah khan RB Leipzig aṭangin €76.5million (£66.4m; $89.1m) bakah add-ons €8.5m-in Manchester United a zawm a, United tan inlan tawh mah se, goal erawh a la khung lo.
Saha ngaihdanah chuan, Sesko hian United tan hlawhtlinna thawkchhuak thei mah se, Red Devils buaina erawh a la pangngai reng thu a sawi a, tlarhma lamah player naupang tawnhriat la nei tam lo an hmang ṭhin hi a fuh lo a tih thu a sawi.
"United zawm turin a inpeih alawm, tharum ngah tak a ni bawk a, heti lamah hi chuan harsatna a nei tam lo ang. Chutih laiin tactic lamah erawh a buai ve deuh dawn, hei hi chu team insiamremna tur niin a lang zawk. Manager hian tihdan kawng a dap thiam turah ngai ang.
"Kum thum emaw kum li emaw liamta vel aṭang khan Manchester United hian hmatawngah player naupang an chhawr ṭhin. Inzir chho mek an ni a, tihsual pawh an ngah bawk a, player dangte nen game-ah inkungkaihna ṭha an nei lo ṭhin.
"Tun hma deuh kha chuan United-ah hian player naupang leh senior te an inbuktawk mawi ṭhin hle. Tawnhriat ngah player te chuan player naupang zawk te an kaihruai ṭhin. Khatianga team inbuktawk tak ang kha an nei ta meuh lo a, an tihsual hi an tisual nawn chho awn awn niin ka hria.
"Ruben Amorim hian a midfielder leh striker te thiam taka a thawh hotir theih chuan an hlawhtling ngei ang. Chutih laiin United hian an mamawh tak midfielder ṭha tak hi an nei lo niin ka hria, midfield-ah harsatna an la nei mek. Heng te a nih avang hian Sesko hi a talbuai chhoh ve deuh chu ka ring a ni.
"Sesko hian thiamna leh theihna sang tak a nei, a sang a, ball kangah a ṭha em em. Mawi tak takin defender-te a tlan pel thiam a, goal chu a khung chho ngei ang. Chutih laiin amah chauh hi chuan United hi a hnuk kal thei dawn lo. Playmaker dang Cunha leh Mbeuma te an rawn pen chhuah a ngai dawn a ni, chuti a nih loh chuan Sesko pawh hi engtihna mah a ni dawn lo a ni," tiin Saha chuan a sawi.
International break neih mek a ni a, September ni 14 hian Manchester United chuan Manchester City an hmachhawn dawn a ni.