Manchester United chuan Benjamin Sesko an la dawn hnai niin The Athletic chuan a tarlang. Newcastle United nen Sesko hi an inchuh a, hetih lai hian Sesko chuan Old Trafford lam pan a thlang ta zawk niin The Athletic chuan a tarlang a ni.

Kum 22 manah hian Newcastle United chuan €75million bakah add-ons €5m an thehchhuak a, hei hi RB Leipzig chuan an lo hnar phawt a, a hnuah €90m-in an san leh a, hei hi Leipzig chuan an la chhang let lo.

Nimin mai khan Manchester United pawhin Sesko manah €75m bakah add-ons €10m an thehchhuak ve ta bawk a, hemi chungchangah hian Leipzig chuan thuchhuak an la nei lo bawk.

Player duhthlanna a pawimawh ber a, Sesko chuan Manchester United pan a thlang ta zawk niin The Athletic chuan a tarlang. Hetih lai hian a man chungchangah leh mimal thilah erawh inremna engmah a la awm lo thung.

Sum lamah chuan Newcastle United hian harsatna an nei lo a, RB Leipzig lamin a man an chhiar zat zat pek an inhuam. Mahse club leh club lo inrem ringawt mah se, player-in chhuah a duh miau loh chuan transfer a thleng thei bik lo.

Newcastle United an che hmasa zawk a, sum pawh an thehchhuak hmasa zawk. Sesko an dawr dan kawngah hian club pahnih te kalphung a inang lo a, Manchester United erawh chuan player duhna lam hriat hmasak phawt hnua chet lak an tum a, Sesko-a duhthlanna lam an hre ta a, chet an la ve ta niin a lang.

Season liamta khan Sesko hian competition hrang hrangah RB Leipzig tan goal 21 a khung a, German club tan hian game 87 a khel tawh a, goal 39 a khung tawh bawk.