Inrinni zan Serie A inkhelah Juventus chuan Allianz Stadium-ah Atalanta an lo mikhual a, Juventus hi si khat faia tlawmin, Atalanta hi point thum pawimawh tak nen an haw.

Inkhela goal awmchhun hi Duvan Zapata-a’n 28mins-a a thun a ni a, hei hi kum 1989 hnua Atalanta in Juventus home-a hnehna an chan leh vawi khatna a ni.

Juventus hi an che tha lo hle a, heti hian Serie A game 14 an khelh tawh atangin vawi nga an tlawm tawh a, Atalanta erawh heti hian a zawnin game riat chhung chak loh an nei tawh lo.

Khelh 14-ah Juventus hia point 21 neiin, pariatnaah an awm mek a, Atalanta hian khelh 14-ah point 28 neiin palinaah an awm ve mek thung a ni.

Massimiliano Allegri leh a naute hian season kal mekah Serie A game 14 an khelh tawh atangin goal 18 bak an la khung lova, tuna top 10-a awm zinga goal khung tlem ber an ni mek a, kar liamta khan UEFA Champions League inkhelah 4-0 laiin Chelsea lakah an tlawm zo chiah bawk a ni.