Sunday zan Serie A inkhelah AC Milan chuan San Siro-ah Sassuolo an lo mikhual a, mikhual lam Sassuolo hian 3-1 in hnehna an chang a, point thum an hlawhchhuak.

AC Milan hian hma an hruai hmasa a, minute sawmhnih vel an khelhin Alessio Ramagnoli chuan Milan tan goal-ah ball a tauh lut a, mahse Sassuolo hian minute thum hnuah Gianluca Scamacca goal hmangin an si phurh an rul nghal nghal.

AC Milan vanneih ber zan a ni hauh lova, darkar chanve chuang hret an khelhin Milan defender Simon Kjaer chuan an lamah a ti lut palh a, Sassuolo-in 2-1 in hma an hruai phah.

Second half-ah Domenico Berardi chuan Sassuolo goal thumna khung, 3-1 in Sassuolo hian hma an hruai a, Berardi-a goal khung a tanga minute sawm hnu velah Milan tana goal khungtu Romagnoli chu hnawhchhuah niin, player 10-in Milan in inkhel an khar.

Inrinni zanlai khan champion lai Inter Milan chuan Venezia an tlawh a, Inter hi si hnih faiin an chak a, point thum pawimawh tak an hlawhchhuak.

Inter goal hnihte hi Hakan Calhanoglu leh Lautaro Martinez-te thun a ni a, Lautaro goal hi penalty spot atanga a khung a ni.

Khelh 14-ah AC Milan hian point 32 an hlawhchhuak tawha, pahnihnaah awmin, an hnuai chiahah Inter Milan an awm a, Inter hian khelh 14-ah point 31 an nei ve mek a ni.