Real Madrid defender hlui kum 38 mi Sergio Ramos chuan football chawlhsan a la tum lo. Hetih lai hian nikum July thlaa Sevilla a chhuahsan atang khan club thar a la nei leh lo.

Mahni in lamah training a nei ngar ngar. Real Madrid chuan tlarhnung lamah harsatna tawk mah se, Ramos koh leh an tum ta lo bawk.

Mexican club Monterrey  chuan Ramos hi an dawr mek a, inbiakna hi a tir lam a la ni a, indawrna erawh a kaltluang niin ESPN chuan a tarlang.

ESPN-in a kawmnaah Monterrey president Antonio Noriega chuan, "Ramos hi lak kan tum zinga mi a ni a, inbiakna pawh kan kalpui. Thil thleng thei lo a awm lo a nia.

"Inbiakna kimchang erawh ka sawi vek lo ang, inbiakna kan kalpui tan mek a, tihtur erawh a la tam khawp mai, inremna tur pawh a la tam dawn a ni," tiin a sawi.

Monterrey hi Liga MX Clausura table-ah 13-na an ni mek a, tun season-ah game 4 an khel tawh. Nikum nipui lai khan MLS club San Diego FC pawh Ramos hi an lo dawr tawh a, mahse inremna an nei thei ta lo a ni.

Ramos hi Sevilla academy chhuak a ni a, kum 2005 khan Real Madrid a pan a, captain ni chhunzawmin, Los Blancos tan game 650 aia tam a khel. Champions League no mawi vawi 4 a chawi a, La Liga title 5 a la bawk. PSG a pan hnuin Ligue 1 title 2 a la bawk a ni.

Spain tan game 180 a khel a, captain ni chhoin World Cup 2010 leh Euro 2008 leh 2012 a chawi a, kum 2023 khan ram tana inkhelh a chawlhsan.