Manchester City chuan Borussia Dortmund striker Erling Braut Haaland chu an striker Sergio Aguero thlaktu atan an duh thu an sawi.

Sergio Aguero chuan tun hnaiah khan Premier League huang chhungah ram dang player zinga goal thun hnem ber record a siam thar a, Manchester City pawhin Aguero awm zel dan tur chungchangah ama thutlukna an dah pawimawhsak hle a ni.

Kum 31-a upa Aguero hian a hun a ti a nih chuan a duh hunah Manchester City a chhuahsan an remti dawn niin club chuan an sawi a. An inthen hun a thleng dawn ta te a nih chuan a hmun ruak luah tur hian City chuan Erling Braut Haaland chu an duh ber niin an sawi a ni.

Erling Braut Haaland hian RB Salzburg tan goal a thun thei hle a, Borussia Dortmund a zawm hnuah pawh goal thun hi a chhunzawm zel bawk a. Hetiang taka a chet that chhoh avang hian Manchester City pawhin an hmutai hle.

City chuan an hnena kum thum chhung lo awm tawh, Erling Haaland-a agent leh a pa Alf-Inge Haaland chu an bepawp tawh a. 2000 leh 2003 inkara an player lo ni thin nen an inzawmna tha tak behchhan hian dawr zui pawh an rilruk deuh niin an sawi a ni.

Haaland hian tun hnaiah Borussia Dortmund a zawm ve deuh chauh a, a contract ziahah chuan release clause a awm tel a, hei hi 2021-22 season tawp hunah a nung ve tan dawn a. Sport Bild chuan a release clause hi £63 million vel niin an tarlang a ni.

Argentine striker Sergio Aguero thlak theitu tur hian City chuan Inter Milan forward Mauro Icardi chu an thlithlai tel tho niin an sawi a. Argentine forward Icardi hian Inter Milan atangin loan-in Paris Saint-Germain chu tun season chhung atan a zawm mek a ni.

Aguero aiawh thei tura ngaih kum 22-a upa Gabriel Jesus an nei tawh tho a, chuti chung chuan City thuneitute chuan Brazilian forward lakah hian rinna an la nghat chiang ngam chiah lo niin a ngaih theih a ni.