Serchhip District Football Association buatsaih Serchhip District Football Championship chu Thawhtanni (vawiin) chawhnu lam khan khar a ni a, final hmuhnawm takah New Serchhip FC chuan 2-1 in FC Serchhip Kawnpui an hneh.
He Championship hi Khawtetlang khelmualah February ni 16 atang khan khelh tan a ni a, club pariat telin group pahnih (Group A leh Group B)-ah then niin group khatah hian team pali zel an awm.
Group-a a sang fal pahnihin semi-final an lut a, Inrinni liamta khan semi-final hi khelh a ni.
Champion team ni ta New Serchhip FC hian semi-final-ah Hmar Veng FC an hneh a, final-a chak zo lo FC Serchhip Kawnpui hian semi-final-ah Chhiahtlang FC an hneh ve bawk.
Final-ah hian FC Serchhip Kawnpui lamin goal an khung hmasa a, minute 33-naah Laltlanthanga hmangin hma an hruai.
Team pahnihte hian goal khung tumin theihtawp an chhuah a, New Serchhip lam hian penalty hmuh beiseina tur vawihnih vel an nei a mahse referee-in a ham lo.
Inkhel thlir chuan inhnehtawk viauin lang mahse New Serchhip hi goal-ah an hlauhawm zawk mah a, FC Serchhip Kawnpui pawhin chance an nei ve nual bawk.
First half-ah goal dang a luhbelh lo va, FC Serchhip Kawnpui hian si khatin hma an hruai tluan.
Second half an tan deuh chiah tihah New Serchhip lamin an si phurh an sut teuh hle a, tlarhnung mawi taka an tlan pelh hnuah a tawp an khar fuh lo va, goal ban sirah an petchhuak. Goal-ah chantir ngat se chuan goal ropui tur a ni.
FC Serchhip Kawnpui lamin an hmahruaina tihpun an tum ve zui zel a, New Serchhip lamin an si phurh sut an tum ruh tlat thung.
Minute 61-naah New Serchhip hi an hlawhtling ta nge nge a, H. Lalrempuia chuan mawi taka ball an in pek kual hnuin a pet goal a an si phurh a sut.
Team pahnihte hian champion an tum tih a hriat a, goal khung belh an tum ve ve a inkhel hmuhnawm a tling.
Minute 69-naah New Serchhip lamin goal khung theihna hun tha tak an nei leh a, an player pakhatin amah deuh chauh a ball a chan hnuin a khalh kawi leh a goal-ah a chantir zo lo.
Hemi hnu minute 72-naah New Serchhip lamin corner an hlawhchhuak a, heta tanga ball lokal hi H. Lalremruata chuan a pet goal a hei hi an champion-na goal a ni ta bawk a ni.
CHAWIMAWINA DANG SEMCHHUAHTE:
* Best Player: Remlalruata (New Serchhip FC)
* Top Scorer: H Lalremruata, New Serchhip FC (6 goals)
* Fair Play: FC Serchhip Kawnpui
New Serchhip FC hian MFA Cup lo awm turah Serchhip District ai an awh nghal dawn a, he intihsiakna hi March thla hian Serchhip hian an thleng dawn a, Khawtetlang khelmualah bawk hian khelh tur a ni.
Written by: Serchhip Chelsea