Boxing-a world heavyweight champion lo ni tawh Mike Tyson chu kumin September thla hian a lo kir dawna, September ni 13-ah exhibition match a khel dawn.

He exhibition match-ah hian Tyson hian Roy Jones Jr. a hmachhawn dawna, round 8 an khel dawn.

He exhibition match hi California, USA-a Dignity Health Sports Park-a neih a ni dawna, heavyweight boxer awm tawh zawng zawnga lar ber zinga mi Tyson kan hmu leh ngei dawnin a lang.

Nike Tyson-Roy Jones exhibition match undercard-ah hian NBA player hlui Nate Robinson leh Youtuber Jake Paul te chu an inhnek ve dawn bawk niin sawi a ni.

Kum 54 mi hian social media lamah a training lai video dah chhuakin, naupang tawh lo hle mahse a la fit that zia leh a la chet ran zia te a hmuh theiha, lo kir leh tur anga thawm a neih fo hnuah thu tihchian a ni ta.

Tyson leh Roy Jones-te inhnek tur hi documentary-a siam a ni dawn niin sawi a ni a, he documentary-ah hian episode 10 awm tura ruahman a nih thu tarlan a ni.

Tyson-a inhnek hnuhnun ber hi kum 15 kalta daih tawh kha a ni a, a bout hnuhnung berah Kevin McBride chu round ruknaah a hneh lo.

Tyson bakah hian Evander Holyfield pawh lo kir tur anga sawi a ni a, Tyson nen hian an inhnek mai a rinawm hman viau laiin, Roy Jones zawk Tyson hian a hmachhawn dawn ta a ni.