Senegal chuan an star Sadio Mane thlak nan RSC Anderlecht defender Moussa N’Diaye chu World Cup khel turin an ko.

Kan hriat tak angin Mane hi Bayern Munich match hnuhnung berah a inhliam a nih kha, heti chung hian Senegal coach Aliou Ciasse chuan an forward chhuanvawr hi a hmaih phal chuang lo, kar hmasa mai khan World Cup match hmasa ber a khel thei dawn loh tih thu a than hnuin a hliam avangin World Cup chhung zawng a chawlh a ngaih thu an puang leh nghal, hetiang a nih tak si ah chuan amah thlaktu tur an koh mai a ngai ta a ni.

Senegal hian kum 30 a upa forward Mane thlak nan hian kum 20 mi defender N’Diaye chu an ko ta zawk a, N’Diaye club khelhna Anderlecht lam pawhin Mane thlaktu turin Senegal squad-a an koh thu leh Qatar pana a zin nghal tur thu an chhuah.

Bayern forward thlaktu tura left-back a ko ta daih hi mi mak tih hlawh hle mah se Mane lo hi Senegal hian hmatawng players paruk a la nei tho a, chung zingah chuan Watford winger Ismaila Sarr leh Marseille forward Bamba Dieng te an tel.

Moussa N’Diaye hi Belgian League lamah Anderlecht tan match 6 tun season-ah a khel ve tawh a, Senegal under 20 tan inlan ve zeuh zeuh tawhin, senior team tan erawh an vawikhat kohna a ni.