Al-Nassr defender Aymeric Laporte chuan Saudi Arabia-a lut zingah lungawi lo tam tak an awm tih an sawi.

Kum 29 mi hian nikum nipui lai khan Manchester City a chhuahsan a, £23.6m-in Cristiano Ronaldo, Sadio Mane, Alex Telles leh Marcelo Brozovic-te awmna Al-Nassr a zawm. Kan hriat theuh angin, Saudi club-te tunhnaiah an che na a, nipui transfer hun hnuhnung berah khan player tha an thlemlut hnem hle.

Middle East-a lut langsar zingah Jordan Henderson a inthiarfihlim hmasa ber a, kar hmasa khan Al-Ettifaq kalsanin Europe-ah a kir. Al-Ittihad striker Karim Benzema pawh a nget lo niin an sawi a, Europe-a let tur angin chanchin a nei deuh reng.

Laporte chuan, "Europe nena khaikhin engkim a danglam a, pawimawh ber chu in benbel a ni. Tlangnel taka awm turin thil tih a harsa a, Europe atanga pan zingah duhkhawp hmu lo kan tam. Kan lakah thain min duhsak viau mahse a tawk lova, lungawi lohna tur leh phunna tur a awm nual mai.

"Europe-ah kha chuan hlawh min pek hnem bakah min duat dan an thiam a, zep lohah chuan insiamrem harsa kan ti. Ka thusawi hi ka tawnhriat atanga ka sawi a ni a, midang ngaihdan erawh ka hre lo. Lut tura min thlem lai khan theihtawp an chhuah a, mahse kan nitin hun hman dan a dang ta deuh.

"Kan inpekna leh thawhrimnate'n anmahniah awmzia a nei tam lova, an nun leh sumdawnnaah chiah an buai avangin min ngaihsak tak tak hman lo. Inremna kan ziahfel vek tawh hnuah pawm leh loh an ngah a, hetiang hi Europe-ah a thlen ngai ka hre lo. Kan hnen atangin thil engemaw min chhuhsak a, kawng danga min rulh dan an ngaihtuah leh thin." tiin Spanish newspaper Diario AS-in an kawmnaah a sawi.

Khawvela hriata lar zingah, Saudi Arabia pan hmasa ber chu Cristiano Ronaldo a ni a, nikum kum tirah niin boruak a nei lian hle. Portugal captain hi player tha tam takin an zui lut a, hlawh leh hamthatna dang thahnem tak dawng mahse an hlim vek lo.

Sawi chhunzawmin Laporte chuan, "Sum vanga lut hi a tam zawk kan ni a, football vang chauha insawn kan nilo. Kan sum hmuh a that tawk avangin thenkhat chu kan lawm a, mahse hei aia pawimawh zawk zawn ka nei. Khelmual pawna kan lakluh a tam ang huin khelmual chhunga kan sulhnu a ropui lova, hei hi thil tha lo tak niin ka hria.

"Nunphung leh kan khawsak dan changchangah pawh engkim a danglam a, lirtheia darkar thum thut chang a awm. Riyadh-ah chuan ka hun tam zawk lirtheiah ka hmang a, a chhan chu traffic jam a nasat em vang a ni. Ka thil tawnte avang hian chhuah duhna rilru ka pu lova, mahse thil thlen dan a zirin a danglam thei. Engemaw a awm anih chuan ka agent ka be dawn a, ka chhungte thutluknaah ka in nghat ang." tiin a sawi.

A ngaihdan hi Al-Nassr tana a khelhpui Mane-in a tawmpui lo thung a, Saudi Arabia-ah hlim tih Zirtawpni khan a sawi. Mane hian nipui lai tho khan Bayern Munich atangin a zawm a, Saudi Pro League-ah game 18 khelin goal riat a khung tawh.

Liverpool leh Southampton forward ni thin chuan, "Europe-a ka awm tawh loh vang maiin hlim loah min ngai a, ral khata inhmuh ang hian thil a thleng lo. Europe-a kan awm loh chuan in hrethiam lova, kan chhiatna lai ringawt min hmuhsak thin.

"Vanneihthlak takin Saudi Pro League hi alo tha khawp mai a, tunah chuan khawvela thlir rawn kan ni tawh. Saudi Arabia hre ngai lote'n min ngaihven a, hei hi ringawt pawh hmasawnna lian tak a ni. Ka tan chuan nuam ti taka inkhelh a pawimawh ber a, thildanga in ham buai vak ka tum lo." tiin a sawi.

Saudi Arabia hian khawvel hmuha inphochhuah an tumna kawngah hmachhawp lian tak tak an nei a, an tih fuh chuan an la hlawkpui viau thei tih hriain sum pawh an ui lo. Europe atangin player, match official leh rorel thiam an chah lut ruih ruih a, transfer bazarah pawh tel thang tawh ang maiin an tlangnel nghal hle.

Saudi Pro League (SPL) hian team enkawl lama sulhnu nei tawh Steven Gerrard, Marcelo Gallardo, Jorge Jesus, Slaven Bilic leh Luis Castro-te pawh an kawl a, English Premier League atangin official chah luh an tum mek bawk. SPL chief operating officer Carlo Nohra chuan bul an tan ek ek chauh tih a sawi a, hmasawn an tumna kawngah Saudi sawrkarin an pui tha hle BBC News a hrilh.

An duh leh tum ber chu English Premier League leh La Liga-te el phak a ni a, an hlutna anga teh pheichuan an hnuaiah French Ligue 1 an awm der tawh. An rama football a than len zel theih nan hian rampawn player an lalut zel dawn a, anmahni puala sum hailut turin leilung hausakna an nei tam lo.

An thil tum zinga langsar leh tak pakhat chu tui alh thei tel lova inchawm theih a ni a, an ram hausakna ber hian chatuan a daih dawn lo tih an hre ve ran. Sports atangin sum tam tak an hailut thei tih an hria a, tui alh thei an tlakchham deuh hunah pawh innghahna tlak ni turin an duh.

Crown Prince Mohammed bin Salman kaihhruaina hnuaiah kalphung tha zet an duang a, a hlawhtlin theih nan hmachhawp liantham tak leh hmathlir thui tak an nei. FIFA World Cup hnuhnung pariatah khan tum ruk an tel a, Asian Cup-ah vawi thum lai an champion tawh bawk.

An ram mipui zinga 80% velin football hi an ngaina a, football-ah ram lian ni ngai lo mahse an atchilhna a rei ve tawh hle. An hmachhawp neihte hi a hlawhtling dawn nge a hlawhchham dawn a hriatloh a, an tumna leh inpekna enin ho taka a luan ral mai mai a rinawm loh a ni.